საზოგადოება

ოპოზიციონერი დეპუტატები სპეციალური საგამოძიებო სამსახურის უფროსს მოუწოდებენ, ძალის გადამეტებაზე გამოძიების დეტალები წარადგინონ

ოპოზიციონერი დეპუტატები ხატია დეკანოიძე და თამარ კორძაია სპეციალური საგამოძიებო სამსახურის უფროსს, კოკა კაციტაძეს მიმართავენ და აქტივისტების, აქციაზე დაკავებულების, ჟურნალისტებისა და პოლიტიკოსების მიმართ განხორციელებულ ძალადობაზე დაწყებული გამოძიების დეტალების გასაჯაროებას მოითხოვენ.

"კაციტაძეს მივმართავ, დროა გამოვიდეს და წარუდგინოს საზოგადოებას ანგარიში, რა კონკრეტული ღონისძიებები განახორციელა 2 მაისს აქციაზე დაზიანებულ ჟურნალისტებთან დაკავშირებით.

მოვითხოვთ ჩაატაროს საჯარო ბრიფინგი და გასცეს შეკითხვებს პასუხი, შედგა თუ არა თითოეულზე დაკავების ოქმი, რომელი ქვედანაყოფი იდგა შესაბამის ადგილებში და ვინ იყო ხელმძღვანელი და ვინ იყვნენ შემადგენლობის წევრები სახელებით და გვარებით, როგორც სპეცრაზმიდან, ასევე პოლიციიდან ვინ და რა დროს გამოიძახა სასწრაფო დახმარება დაზარალებულების გადასაყვანად, რომელმა ეკიპაჟმა გადაიყვანა ისინი საავადმყოფოში და გაფორმდა თუ არა შესაბამისი დოკუმენტაცია. გამოვიდეს კოკა კაციტაძე და აცნობოს საზოგადოებას, რომელ ქეისზე რა დოკუმენტია მისთვის წარდგენილი, რადგან ისინი აცხადებენ, რომ უკვე დაწყებულია გამოძიება თითოეულ ამ საკითხთან დაკავშირებით - განაცხადა თამარ კორძაიამ საგანგებო ბრიფინგზე.

ხატია დეკანოიძის თქმით, შინაგან საქმეთა სამინისტროს მიერ, „რუსული კანონის წინააღმდეგ გამართული მშვიდობიანი აქციების დარბევა არალეგიტიმური და არაპროპორციული იყო“.

„მე და თამარ კორძაია, ასევე ჩვენი გუნდი, ძალიან ბევრს ვმუშაობთ იმ ფაქტების შეგროვებაზე, რომელიც ვიხილეთ მთელი ამ პერიოდის განმავლობაში პროტესტის მიმდინარეობისას, რომელიც ძირითადად უკავშირდება ძალადობას ადამიანებზე, პოლიტიკოსებსა და აქტივისტებზე. შინაგან საქმეთა სამინისტროს მიერ, რუსული კანონის წინააღმდეგ მშვიდობიანი აქციების დარბევა არალეგიტიმური და არაპროპორციული იყო. გამოყენებული ფიზიკური ძალა, ხშირ შემთხვევაში გაუტოლდა წამებას, არაადამიანურ, დამამცირებელ მოპყრობას. ხოლო, ადმინისტრაციული დაკავების პრაქტიკა კვლავ შეკრების თავისუფლების მომეტებული შეზღუდვის ინსტრუმენტად იქცა. მიმდინარე აქციების დაშლისას, საპოლიციო ძალები ფიზიკურად უსწორდებოდნენ მშვიდობიანი დემონსტრანტების დიდ ნაწილს, ფიზიკურად გაუსწორდნენ ახალგაზრდებს, ქალებს, კაცებს, ჟურნალისტებს. განსაკუთრებით სასტიკად ნაცემია რამდენიმე ადამიანი - ოპოზიციონერი პოლიტიკოსებიც. სპეცრაზმელებმა სცემეს აქციაზე მყოფი არაერთი პირი. ფიქსირდებოდა შემთხვევები, როდესაც რამდენიმე სპეცრაზმელი პოლიციელები მასაში შეითრევდა აქციის მონაწილეს და ფიზიკურად უსწორდებოდა, მუშტებს ურტყამდა, თმებში ქაჩავდა, წაქცეულებზე წიხლებით დგებოდნენ. დაფიქსირდა არაადამიანური მოპყრობის ფაქტები. ყველა ეს ფაქტი გვაქვს მოპოვებული და შეკრებილი, რასაც გავაგზავნით საერთაშორისო ორგანიზაციებში. ვაგრძელებთ ამ თემაზე მუშაობას“, - აღნიშნა ხატია დეკანოიძემ.