საზოგადოება
109-ე ბაგა-ბაღში მერიის გადაწყვეტილების გააცნობას სიტყვიერი დაპირისპირება მოჰყვა
თბილისის მერის მოადგილემ - ილია ელოშვილმა 109-ე ბაგა-ბაღის აღსაზრდელების მშობლებს მერიის გადაწყვეტილება გააცნო, რასაც სიტყვიერი დაპირისპირება მოჰყვა.
მერიის გადაწყვეტილებით მშობლები უკმაყოფილოები არიან და მათთვის ბავშვების სხვა ბაღებში გადანაწილება მიუღებელია, რადგან მიიჩნევენ შენობა ავარიული არ არის.
ბერი გაბრიელ სალოსის ქუჩაზე, 109-ე ბაგა-ბაღში მშობლებსა და მასწავლებლებს დედაქალაქის მერის მოადგილე ილია ელოშვილი, თბილისის საბავშვო ბაგა-ბაღების მართვის სააგენტოს ხელმძღვანელი კახაბერ გვანცელაძე და თბილისის საკრებულოს წევრები შეხვდნენ.
ილია ელოშვილი ამბობს, რომ ბაღი ავარიული და სადემონტაჟოა. ის ბაღის ადგილას რაიმე ტიპის კომერციული შენობის აშენებასაც გამორიცხავს.
“მიმდინარეობს თბილისის ყველა ბაღის გეგმური გადამოწმება. შესაბამისად, 109-ე ბაღის გადამოწმებამ აჩვენა, რომ სამხარაულის დასკვნა არსებობს. ბაღი არის ავარიული, სადემონტაჟო და აქ სწავლის გაგრძელება შეუძლებელია. შესაბამისად, ისევე, როგორც 12 ბაღში, აქ დროებით ვწყვეტთ სწავლის პროცესს. ბავშვები გადანაწილდებიან მიმდებარე ბაღებში. ყველა თანამშრომელი შეინარჩუნებს იმ პირობებს, რაც მათ გააჩნიათ. ბავშვებს ექნებათ საუკეთესო პირობები, სადაც ისინი გადანაწილდებიან. რაც შეეხება შენობას, გამორიცხულია, რომ ბაღის ადგილას აშენდეს რაიმე ტიპის კომერციული შენობა, გარდა ბაღისა. ეს არის აბსოლუტურად წარმოუდგენელი და მიზანშეუწონელი, ბაღის ადგილას ავაშენოთ კომერციული შენობები”, - განაცხადა ილია ელოშვილმა.
დღეს, 109-ე ბაგა-ბაღის აღსაზრდელების მშობლებმა და პედაგოგებმა ბერი გაბრიელ სალოსის ქუჩა თბილისის მერთან შეხვედრის, ბაღში სასწავლო პროცესი აღდგენისა და ბაღში გამაგრებითი სარემონტო სამუშაოების ჩატარების მოთხოვნით გადაკეტეს, თუმცა სამართალდამცველებმა აქციის მონაწილეების გზის სავალი ნაწილი დაატოვებინეს.
ოფიციალური ინფორმაციით, 18 აპრილიდან ბაღი სამხარაულის ექსპერტიზის ბიუროს საექსპერტო დასკვნის საფუძველზე იკეტება. თბილისის საბავშვო ბაგა-ბაღების მართვის სააგენტოში აცხადებენ, რომ დასკვნის მიხედვით, N109 ბაგა-ბაღის შენობის ძირითადი ნაწილის ტექნიკური მდგომარეობა არადამაკმაყოფილებელია და საექსპლუატაციო ვარგიასიანობის თვალსაზრისით, მეორე კატეგორიას მიეკუთვნება, რაც იმას ნიშნავს, რომ შენობას გამაგრება სჭირდება.
ცირა გურგენიძე