საზოგადოება

14 წლამდე მოზარდებში გამოიკვეთა შემდეგი დარღვევები: აზარტული თამაშები, აკრძალული ნივთების ფლობა, ალკოჰოლის მოხმარების მცდელობები, თამბაქოს მოხმარება და თანხის შეგროვება - განათლების სამინისტრო

განათლებისა და მეცნიერების მინისტრის მოადგილის, ლია გიგაურის ინფორმაციით, 14 წლამდე ასაკის სკოლის მოსწავლეებში რამდენიმე სახის დარღვევა იკვეთება, მაგალითად, აზარტული თამაშები, აკრძალული ნივთების ფლობა, ალკოჰოლის მოხმარების მცდელობა, თამბაქოს მოხმარება და თანხის შეგროვება.

ამის შესახებ გიგაურმა განათლებისა და მეცნიერების საპარლამენტო კომიტეტის სხდომაზე ისაუბრა, სადაც ბულინგთან ბრძოლის მიმართულებით სამინისტროს სტრატეგია წარადგინა.

„ცალკე გამოვყავით დარღვევები, რომლებიც 14 წლამდე მოზარდებში გამოიკვეთა და ესენია - აზარტული თამაშები და ეს ეხება როგორც კომპიუტერულ თამაშებს, ასევე ბანქოს, ასევე გამოიკვეთა აკრძალული ნივთების ფლობა, ალკოჰოლის მოხმარების მცდელობები და თამბაქოს მოხმარება, დაფიქსირდა რამდენიმე შემთხვევა თანხის შეგროვების, იყო ასევე მოსწავლეთა შორის ფიზიკური და სიტყვიერი შეურაცხყოფა, სავარაუდო ნარკოტიკული საშუალების მოხმარების 1 და 2 შემთხვევა, თუმცა ამ ფაქტების შემდეგ მშობლებმა სკოლებში მოიტანეს ცნობები, რომ აბები, რომელსაც ბავშვები ფლობდნენ, ექიმის მიერ იყო დანიშნული. მოცემული გვაქვს ასევე ინვენტარის დაზიანების შემთხვევები. ყველა შემთხვევა, რომელზეც მე ვსაუბრობ, სკოლის პერიმეტრის შიგნით, ან სკოლის ეზოში არის დაფიქსირებული“, - აღნიშნა გიგაურმა.