საზოგადოება

162-ე სკოლაში სასწავლო პროცესი განახლდა

162-ე სკოლაში სასწავლო პროცესი დღეიდან განახლდა. ადმინისტრაციის ცნობით, გაკვეთილები 09:00 საათზე დაიწყო და სკოლის დირექტორიც ადგილზე იმყოფება.

შეგახსენებთ, რომ გუშინ, თბილისის 162-ე საჯარო სკოლაში სასწავლო პროცესი ჩაიშალა.

სკოლის პედაგოგები სწავლის პროცესის ჩაშლის მიზეზად პირველ ექსპერიმენტულ სკოლასთან გაფორმებულ მემორანდუმს ასახელებდნენ.

მათი განცხადებით, განათლების მინისტრისგან პირდაპირ ეთერში შეიტყვეს, რომ პირველი ექსპერიმენტული სკოლა 162-ე სკოლის შენობაში გადმოდის.

ამასთან, განათლების სამინისტროს ინფორმაციით, წარმატებულ სკოლებთან თანამშრომლობა სწავლის ხარისხის ასამაღლებლად, საქართველოს განათლებისა და მეცნიერების სამინისტრო საჯარო სკოლების გაძლიერებისა და მათ შორის პარტნიორობის ხელშეწყობის მიზნით, ახალ პროექტს იწყებს.

უწყების ინფორმაციით, პროექტი გულისხმობს სკოლებს შორის ფართო ფორმატის კომპლექსურ თანამშრომლობას, რომელიც მოიცავს, როგორც ინფრასტრუქტურული რესურსით ერთობლივი სარგებლობის უფლებას, ისე, საგანმანათლებლო პროგრამების დანერგვაში მხარდაჭერას, პედაგოგების გაცვლით პროგრამებში ჩართვას, საგანმანათლებლო რესურსების გაზიარების მიმართულებით თანამშრომლობას.

პროექტის ფარგლებში, თანამშრომლობის პირველი მემორანდუმი თბილისის 1 ექსპერიმენტულ სკოლასა და 162-ე საჯარო სკოლას შორის გაფორმდა. მემორანდუმის ფარგლებში, პირველი ექსპერიმენტული სკოლა გაუზიარებს თავის ცოდნასა და გამოცდილებას 162-ე საჯარო სკოლას, მიაწოდებს ინფორმაციას პირველი ექსპერიმენტული სკოლის პროგრამების თაობაზე და ხელს შეუწყობს 162-ე საჯარო სკოლას მსგავსი პროგრამების დანერგვაში.

სკოლაში მიმდინარე პროცესზე კომენტარი განათლებისა და მეცნიერების მინისტრმა ალექსანდრე ჯეჯელავამ გააკეთა.

„თუ პედაგოგიური კოლექტივი გადაწყვეტს, რომ არ უნდათ ასეთი მემორანდუმი, პირობას გაძლევთ, რომ ის გაუქმდება“, - განაცხადა მინისტრმა.

ნინო ექვთიმიშვილი