მსოფლიო

180 ქვეყანას შორის 64-ე ადგილი - „რეპორტიორები საზღვრების გარეშე“-მ საქართველოში მედიათავისუფლება შეაფასა

საერთაშორისო ორგანიზაციამ „რეპორტიორები საზღვრების გარეშე“ 2017 წლის პრესის თავისუფლების ანგარიშში გამოაქვეყნა. მასში მითითებულია მედიადამოუკიდებლობისა და თავისუფლების ინდექსი.

ანგარიში აღწერს 2017 წელს, როგორც „პროპაგანდისა და თავისუფლების შეზღუდვის პერიოდს“.

ორგანიზაციის შეფასებით, დემოკრატიულ საზოგადოებებში სულ უფრო იზღუდება მედიათავისუფლება.

საქართველო ზედიზედ მეორე წელია 64-ე ადგილს იკავებს. ანგარიშის მიხედვით, ბოლოდროინდელმა რეფორმებმა გააუმჯობესა ქართული მედიალანდშაფტი, მაგრამ იქვე აღნიშნულია, რომ ამის მიუხედავად მედია ისევ პოლარიზებული რჩება, ხოლო მედიის მფლობელები სარედაქციო შინაარს ხშირად განსაზღვრავენ.

გარდა ამისა, ნახსენებია „რუსთავი 2“-ის საქმე. ორგანიზაციის აზრით, სასამართლო დავა იქნება ტესტი , რომელიც განსაზღვრავს მედიაპლურალიზმს საქართველოში.

რაც შეეხება რეგიონის ქვეყნების მდგომარეობას ამ კუთხით, რუსეთმა 180 ქვეყანას შორის 148-ე ადგილი დაიკავა, თურქეთმა -155-ე, სომხეთმა - 79-ე, აზერბაიჯანმა - 162-ე, უკრაინამ - 102-ე.

რეიტინგში პირველი ადგილი ნორვეგიამ დაიკავა, ხოლო მედიათავისუფლება ყველაზე ცუდ დღეშია ჩრდილოეთ კორეაში.

ორგანიზაციის ცნობით, 2017 წელს 65 ჟურნალისტი მოკლეს, 54 დღემდე ტყვედ არის აყვანილი, 326 კი პატიმრობაშია.

ანა მებურიშვილი