საზოგადოება
2-3 დღეში პეკინის ქუჩა სრულად გაიხსნება - დავით ნარმანია
თბილისის მერის, დავით ნარმანიას ინფორმაციით, 2-3 დღეში, პეკინის გამზირის მარცხენა მხარის ტროტუარის მოპირკეთების შემდეგ ქუჩა სრულად გაიხნება.
„პეკინის ქუჩის რეაბილიტაცია პრაქტიკულად, დასრულებულია. საგზაო მოძრაობა მთლიანად აღდგა და უახლოეს 2-3 დღეში დასრულდება მარცხენა მხარეს არსებული ტროტუარების მოპირკეთება. შემდეგ უკვე როგორც ავტომობილებისთვის, ასევე ფეხით მოსიარულეებისთვის პეკინის ქუჩა სრულად იქნება გახსნილი“,-თქვა თბილისის მერმა.
დავით ნარმანიამ არ გამორიცხა, რომ პეკინის ქუჩაზე ცალმხრივი მოძრაობა შენარჩუნდეს.
„პეკინის ქუჩაზე ამ ეტაპზე მოძრაობა თავისუფლად ხდება. ჩვენ დავტოვეთ ის რეჟიმი, რაც პეკინის ქუჩის რეაბილიტაციის დროს გვქონდა. ანუ ცალმხრივი მოძრაობაა ყაზბეგიდან 26 მაისის მოედნის მიმართულებით, ისევე როგორც 26 მაისის მოედნიდან კოსტავას და შემდეგ უკვე შარტავას ქუჩების გავლით არის ცალმხრივი მოძრაობა. იმ შემთხვევაში, თუ რაიმე სახის არსებითი დაბრკოლებები არ იქნება, არ გამოვრიცხავ, რომ ეს მოძრაობა ასევე დარჩეს“, - აღნიშნა ნარმანიამ.
პეკინის ქუჩა სარეაბილიტაციო სამუშაოები 17 ივნისს დაიწყო.
ანა მებურიშვილი