საზოგადოება

2 მილიონი ლარი დაიხარჯა ხმელ ჯოხებზე - ალექსანდრე ელისაშვილი (ვიდეო)

საკრებულოს დამოუკიდებელი დეპუტატის, ალეკო ელისაშვილის განცხადებით, თბილისის მერიის „მილიონი ხის“ კამპანიის ფარგლებში თბილისის ზღვასთან დარგულმა ხეებმა არ გაიხარა და ფიჩხებად იქცა.

ელისაშვილმა ფეისბუკის საკუთარ გვერდზე ვიდეო გამოაქვეყნა, სადაც ის თბილისის ზღვასთან არსებულ დენდროლოგიურ პარკში ხეების მდგომარეობას აკვირდებოდა. მისი თქმით, ხეების დარგვაზე 2 მილიონი ლარია დახარჯული.

„ჩვენ ვართ დენდროლოგიურ პარკში თბილისის ზღვასთან. ამაზე 2 მილიონი ლარი დაიხარჯა. თბილისის მერიის ბიუჯეტიდან გამოყოფილი თანხა საკრებულომ დაამტკიცა და აქ უნდა დარგულიყო ხეები. ნარმანიამ საზეიმოდ არაერთხელ თქვა, რომ მისი „მილიონი ხის პროექტიდან“ 365 ათასი ხე დაირგო დენდროლოგიურ პარკში თბილისის ზღვასთან და არის ლამის, 100%-იანი გახარება“, - განაცხადა ელისაშვილმა.

ელისაშვილის თქმით, კადრში ნაჩვენები ჯოხები კამპანიის განმავლობაში დარგული ხეებია.

„იმის ჩვენება მინდოდა, რომ ასე იხარჯება 2 მილიონი ლარი და ვითომ არის გახარებული და გამწვანებული 365 ათასი ხე. სინამდვილეში კი 365 ათასი ჯოხი არის ჩარჭობილი აქ და უპატრონოდ მიყრილი“, - თქვა საკრებულოს დამოუკიდებელმა დეპუტატმა.

შეგახსენებთ, რომ თბილისის მერმა დავით ნარმანიამ 2016 წლის თებერვალში ტელეკომპანია „მაესტროს“ ეთერში განაცხადა, რომ „მილიონი ხის კამპანიის“ ფარგლებში „დენდროლოგიურ პარკში რამდენიმე ათასი ხე დაირგო“. მედიაორგანიზაციის „ფაქტჩეკის“ ცნობით, რომელიც „მილიონი ხის“ ფარგლებში გაფორმებული ხელშეკრულებებს დაეყრდნო, 315 720 ნერგი იქნა შესყიდული თბილისის დენდროლოგიური პარკისა და მის მიმდებარე ტერიტორიაზე დასარგავად. როგორც „მილიონი ხის“ საიტზე დართულ რუკაზეა მითითებული, თბილისის ზღვის მიმდებარე ტერიტორიაზე ამ დროისთვის 327000 ხეა დარგული, ხოლო უშუალოდ დენდროლოგიურ პარკში - 7837 ხე.

ანა მებურიშვილი