კომენტარი

20 და 21 ნოემბერს ძლიერ ქარს, თოვას და ყინვას ელიან

სინოპტიკოსები 20 და 21 ნოემბრისთვის საქართველოში ძლიერ ქარს და ზოგან თოვას პროგნოზირებენ.

როგორც მედიანიუსს გარემოს ეროვნულ სააგენტოში განუცხადეს, დასავლეთ საქართველოში ხვალ, 20 ნოემბერს დროგამოშვებით ღრუბლიანობა მოიმატებს, თუმცა უმეტესად უნალექოდ ჩაივლის დღე. იქროლებს აღმოსავლეთის ქარი 10-15 მეტრი/წამში, ზოგან ძლიერი 20-25 მეტრი/წამში, დროგამოშვებით 28 მეტრ/წამამდე. ჰაერის მოსალოდნელი ტემპერატურაა: დაბლობში +11, +16; მთაში +4, +9; მაღალ მთაში 0, +5 გრადუსი.

დროგამოშვებით ღრუბლიანობა მოიმატებს აღმოსავლეთ საქართველოშიც. ზოგიერთ რაიონში ნავარაუდევია მცირე თოვლი და ნისლი. იქროლებს აღმოსავლეთის ქარი 10-15 მეტრი/წამში, გორი-სურამის მონაკვეთზე 20-25 მეტრი/წამში. ჰაერის ტემპერატურა იქნება: +1, +6; მთაში 0, +5; მაღალ მთაში -5, 0 გრადუსი.

თბილისში ხვალ უმეტესად ღრუბლიანი ამინდი იქნება. მოსალოდნელია თოვლჭყაპი და ნისლი. იქროლებს სამხრეთ-აღმოსავლეთის ქარი 8-13 მეტრი/წამში. ჰაერის ტემპერატურა კი, 20 ნოემბერს დედაქალაქში +4 გრადუსი იქნება.

ზეგ, 21 ნოემბერს დასავლეთ საქართველოში უმეტესად უნალექო ამინდია მოსალოდნელი, ზოგან შესაძლებელია ნისლი. იქროლებს აღმოსავლეთის ქარი 15-20 მეტრი/წამში, ზოგან ძლიერი 20-25 მეტრი/წამში, დროგამოშვებით 30 მეტრ/წამამდე. ჰაერის მოსალოდნელი ტემპერატურაა: დაბლობში +9, +14; მთაში +2, +7; მაღალ მთაში -1, +4 გრადუსი.

აღმოსავლეთ საქართველოში ღრუბლიანი ამინდი, ზოგან თოვლი და ნისლია ნავარაუდევი. შესაძლებელია ძლიერი თოვაც, მაღალმთიან რაიონებში კი, ქარბუქი. იქროლებს აღმოსავლეთის ქარი 10-15 მეტრი/წამში, ზოგან ძლიერი 20-25 მეტრი/წამში. ჰაერის ტემპერატურა იქნება: დაბლობში -2, +3; მთაში -4, +1; მაღალ მთაში -6, -1 გრადუსი.

თბილისში 21 ნოემბერს ღრუბლიან ამინდს ელიან. ნავარაუდევია თოვა და ნისლი. იქროლებს სამხრეთ-აღმოსავლეთის ქარი 10-15 მეტრი/წამში. ჰაერის ტემპერატურა კი, ზეგ დედაქალაქში +2 გრადუსი იქნება.

ნინო ექვთიმიშვილი