კომენტარი

2013 წლის შემდეგ, ოთარ ფარცხალაძე სახელმწიფო სტრუქტურებთან სიახლოვეს საერთოდ არ გამოჩენილა - გია ვოლსკი

ოთარ ფარცხალაძე სახელმწიფო თანამდებობაზე 10-11 წლის წინ იყო. მას თუ რაიმე დანაშაული აქვს ჩადენილი, სახელმწიფო შესაბამისად იმოქმედებს, – ამის შესახებ საქართველოს პარლამენტის პირველმა ვიცე-სპიკერმა, გია ვოლსკიმ განაცხადა.

„2013 წლის შემდეგ, ოთარ ფარცხალაძე სახელმწიფო სტრუქტურებთან სიახლოვეს საერთოდ არ გამოჩენილა. კითხვები მას შემდეგ უნდა დაისვას, რაც საკითხი შესაბამისი სტრუქტურების მიერ იქნება შესწავლილი. არცერთ შემთხვევაში არ დავუშვებთ, რომ რუსეთის მიმართ სანქციები რაიმე ნიშნით დაკავშირებული იყოს საქართველოს დღევანდელობასთან. ფლობს თუ არა საიდუმლო ინფორმაციას? 10-11 წლის წინანდელ ნებისმიერ ინფორმაციას ყავლი აქვს გასული, მით უმეტეს, სახელმწიფო დონეზე ვითარება ყოველდღე იცვლება. პროკურატურას უსაფთხოების საკითხებზე წვდომა მისი პროფილის გარდა არ აქვს.

შესაბამისი სტრუქტურები არსებობს და როგორც ამერიკის სახელმწიფო დეპარტამენტის ანგარიშშია მითითებული, ყველა სტრუქტურა, რომელიც სანქციებზე მუშაობს, საქართველოში გამართულია და მაღალ დონეზე მუშაობს. მართალი გითხრათ, ვინ იყო მისი რეკომენდატორი თანამდებობაზე დანიშვნისას, ეს არ არის ადამიანი, რომელიც რაიმე ფორმით დაკავშირებულია რომელიმე სტრუქტურასთან. უნდა შეისწავლონ თუ არა შესაბამისმა სტრუქტურებმა? რასაკვირველია, უნდა შეისწავლონ. ტაშ-ფანდური აქვთ ატეხილი, რომ ფარცხალაძეს სანქცია დაუწესეს. ვინც საქართველოში მოქმედ კანონს დაარღვევს, რასაკვირველია, შესაბამისი სტრუქტურების საგანი გახდება. ხავსზე ჩამოკიდებული ოპოზიციის და ვითომ პარტიული სუბიექტების ტაშ-ფანდური ნამდვილად ნაადრევია. ერთ-ერთი ტელევიზია მეკითხებოდა, საქართველოს მოქალაქეობა რატომ არ ჩამოართვითო? დანაშაული უნდა ჰქონდეს ჩადენილი,“ - განაცხადა გია ვოლსკიმ.

შეგახსენებთ, აშშ-ის სახელმწიფო დეპარტამენტმა ოთარ ფარცხალაძის დასანქცირების შესახებ განცხადება გუშინ გაავრცელა.