საზოგადოება

2017 წელს საბიუჯეტო ორგანიზაციებმა ღიად პრორუსულ მედიასაშაულებებთან გააფორმეს კონტრაქტები - MDF

2017 წელს საბიუჯეტო ორგანიზაციებმა რეკლამისა და ინფორმაციის გავრცელების მიზნით კონტრაქტები გაუფორმეს სიძულვილის ენისა და ანტიდასავლური განწყობების გამღვივებელ მედიასაშუალებებს, ასევე ღიად პრორუსულ გამოცემებს. - ამის შესახებ მედიის განვითარების ფონდმა დაწერა თავის კვლევაში, რომელიც ეხება წინასაარჩევნო ფინანსურ მედიაგარემოს.

MDF-ის მონაცემებით, ცესკომ ხელშეკრულება დადო პრორუსული სარედაქციო პოლიტიკის მქონე „ხარისხის არხთან“, სასჯელაღსრულებისა და პრობაციის სამინისტრომ კი კონტრაქტი გაუფორმა პრორუსულ პარტია “ცენტრისტებთან” დაკავშირებულ გამოცემა “თბილისი 24”-ს.

ევროპის საბჭოს რასიზმისა და შეუწყნარებლობის წინააღმდეგ ევროპის კომისიის (ECRI) მეხუთე ციკლის ანგარიშში საქართველოს ხელისუფლებას მისცა რეკომენდაცია, გადახედოს კონტრაქტებს ისეთ მედიასაშუალებებთან, რომლებიც სიძულვილის ენას აღვივებენ. კომისიამ აღნიშნული ხელშეკრულებების გაუქმებისკენ მოუწოდა მმართველ გუნდს.

„ECRI იძლევა რეკომენდაციას, რომ ხელისუფლებამ გადახედოს მის კონტრაქტებს მედიასაშუალებებთან და გააუქმოს, ან განაახლოს ისინი, თუ მედია შეიმჩნევა რასისტულ ან ჰომო/ტრანსფობიულ სიძულვილის ენის გამოვლენაში. ხელისუფლებამ ასევე უნდა უზრუნველყოს, რომ მომავალი კონტრაქტები შეიცავდნენ დათქმას კონტრაქტის გაუქმების შესახებ, თუკი მედიაში გამოვლინდება რასისტული ან ჰომო/ტრანსფობიური სიძულვილის ენა“, - ნათქვამია კომისიის რეკომენდაციაში.

ანა მებურიშვილი