ეკონომიკა

2018 წლის ბიუჯეტის პირველად პროექტში აზიურ ფაროსანასთან საბრძოლველად 4 მილიონი ლარია გამოყოფილი

2018 წლის ბიუჯეტში აზიურ ფაროსანასთან საბრძოლველად 4 მილიონი ლარია გამოყოფილი. ამის შესახებ ფინანსთა მინისტრის მოადგილემ, გიორგი კაკაურიძემ პარლამენტის აგრარულ საკითხთა კომიტეტის სხდომაზე თქვა.

„წელს ჩვენ შევძელით და 16 მილიონი ლარის რესურსის მობილიზება მოვახდინეთ ამ კუთხით. მომდევნო წლის ბიუჯეტში 4 მილიონი ლარია გათვალისწინებული, თუმცა, კიდევ ერთხელ გავიმეორებ, ეს არაა საბოლოო ბიუჯეტი და ის ღონისძიებები, რომლებიც დაიგეგმება, ამისთვის საჭირო რესურსი აუცილებლად უნდა იყოს გათვალისწინებული“, -აღნიშნა კაკაურიძემ.

ოპოზიციის აზრით, ბიუჯეტში ფაროსანისგან დაზარალებული მოსახლეობისთვის კომპენსაციის გაცემა უნდა იყოს გათვალისწინებული.

რეგიონული პოლიტიკის კომიტეტის თავმჯდომარემ გიორგი ლილუაშვილმა განაცხადა, რომ ფაროსანა უკვე აღმოსავლეთ საქართველოს ბაღებსა და ვენახებს ემუქრება.

„ყველაზე დასანანი ისაა, რომ ეს შეიძლება გავრცელდეს აღმოსავლეთ საქართველოში, იმ რეგიონებში, სადაც იწარმოება საექსპორტო პროდუქცია: ხილი ყურძენი და ა.შ.“, -თქვა ლილუაშვილმა.

შეგახსენებთ, აზიური ფაროსანა თბილისამდე მოაღწია.

ანა მებურიშვილი