საზოგადოება

2019 წლიდან თბილისის მერია მემანქანეთა სამუშაო პირობების გაუმჯობესებაზე მუშაობას დაიწყებს - კახა კალაძე

მეტროპოლიტენის მუშაობის განახლებას დედაქალაქის მერი თბილისის მთავრობის სხდომაზე გამოეხმაურა.

როგორც კახა კალაძემ განაცხადა, დედაქალაქის მერიამ მემანქანეებთან შეთანხმებას მიაღწია, რის შედეგადაც მეტროსადგურები უკვე გახსნილია.

მერმა გაფიცულ მემანქანეებთან გუშინდელ შეხვედრაზე ისაუბრა და აღნიშნა, რომ 2019 წლიდან თბილისის მერია მემანქანეთა სამუშაო პირობების გაუმჯობესებაზე მუშაობას დაიწყებს.

"ჩემი მხრიდან იქნა მიწოდებული კიდევ ერთხელ ზუსტი ინფორმაცია, თუ რა მდგომარეობაა კომპანიაში ფინანსურად და თუ რა მდგომარეობაა მუნიციპალიტეტში. ჩვენ ასევე მოვისმინეთ ის არსებული პირობები, რაც აწუხებთ მემანქანეებს და შესაბამისად, ჩემი მხრიდან იქნა გაჟღერებული პირობა, რომ 2019 წლიდან ჩვენ აუცილებლად დავუბრუნდებით ამ საკითხს და შესაბამისად ყველაფერს გავაკეთებთ იმისთვის, რომ სამუშაო პირობები მათთვის იყოს გაუმჯობესებული,"- განაცხადა კახა კალაძემ.

აქვე, დედაქალაქის მერმა განსაკუთრებული მადლობა გადაუხადა ავტობუსების მძღოლებს ამ დღეების განმავლობაში გაწეული მუშაობისთვის და ასევე მოსახლეობას.

კალაძის განცხადებით, მისთვის მნიშვნელოვანია ის მხარდაჭერა, რომელსაც ბოლო დღეების განმავლობაში გრძნობდა.

"გაძლევთ პირობას რომ ყველაფერს გავაკეთებ იმისთვის, რომ ხვალინდელი თბილისი იყოს უკეთესი ჩვენი მომავალი თაობებისთვის,"- განაცხადა დედალაქის მერმა.