უახლესი ამბები
არქივი
საზოგადოება
25 დღე № 520 დადგენილების ამოქმედებიდან - ჰოსპიტალური სექტორი პაციენტებს გეგმიურ ოპერაციების ჩატარებაზე უარს ეუბნება
ერთ თვეც არ გასულა მას შემდეგ რაც № 520-ე დადგენილება ამოქმედდა და ეკატერინე ტიკარაძის მიერ გატარებულმა პირველივე რეფორმამ კლინიკებს და პაციენტებს უკვე მნიშვნელოვანი დარტყმა მიაყენა. ჰოსპიტალური სექტორი პაციენტებს გეგმიურ ოპერაციების ჩატარებაზე უარს ეუბნება.
„ გეგმიური ოპერაციების შეწყვეტის მიზეზი 520 დადგენილებაა“, - ამის შესახებ კომერსანტს „საქართველოს გულის რიტმის ასოციაციის“ პრეზიდენტმა კახაბერ ეცადაშვილმა განუცხადა. მისი თქმით, აპარატების ფასი ბევრად მეტია, ვიდრე 520-ე დადგენილებით განსაზღვრული ტარიფი.
„იმ პაციენტებს, რომლებსაც გეგმიური ოპერაცია სჭირდებათ მოუწევთ ან სამინისტროსთან გაარკვიონ მიზეზი, ან იმ საავადმყოფოებს მიაკითხონ, რომლებიც დადგენილების მომხრეები არიან. ეს ჩვენი ახირება ხომ არ არის, იძულებულები გაგვხადეს კლინიკები, რომ ასე მოვქცეულიყავით. მდგომარეობა მართლაც სავალალოა და ამას ყველაზე მეტად პაციენტები და კლინიკები ვგრძნობთ“ - კახაბერ ეცადაშვილი.
სურათი არც „თბილისის გულის ცენტრში“ იცვლება. კლინიკის გენერალური დირექტორი არჩილ ჩუხრუკიძე აცხადებს, რომ 520-ე დადგენილების ამოქმედების შემდეგ გეგმიურ ოპერაციებს აღარ ატარებენ.
„ჩვენს კლინიკაშიც იგივე მდგომარეობაა როგორიც სხვაგან, ამ ეტაპზე გეგმიური ოპერაციები შევწყვიტეთ. სანამ დადგენილებაში ტარიფები არ გადაიხედება, კლინიკაში გეგმიური ოპერაციები არ ჩატარდება. გადაუდებელ პაციენტებს ჩვეულებრივად ვემსახურებით, კლინიკის ზარალის ხარჯზე. ჩვენ არ შეგვიძლია პაციენტს უარი ვუთხრათ იმ არასწორი გათვლების გამო, რომელიც სამინისტრომ გააკეთა. ამას ვგრძნობთ და პაციენტების ინტერესს ვიცავთ ისევ, რომ მათ სიცოცხლეს საფრთხე არ დაემუქროს. გადაუდებელი ოპერაციების შეწყვეტა ნიშნავს, რომ კლინიკა დაიხურება. თუ გადაუდებელ ოპერაციასაც შევაჩერებთ ეს ნიშნავს, რომ უნდა გამოვიდეთ საყოველთაო ჯანდაცვის პროგრამიდან და კლინიკა დაიხურება.ამას ისიც ემატება, რომ პაციენტებისთვის გაწეული მკურნალობის საფასური თავის დროზე არ გვერიცხება, ბოლო 6 თვის თანხებს დღესაც ველოდებით, სამწუხაროდ, საახალწლოდ მედპერსონალის ხელფასებს ვერ გავცემთ. მათ ვისაც გეგმიური ოპერაცია სჭირდება ორი გზა აქვს ან მივიდნენ სამინისტროში სიტუაციის გასარკვევად, ან მიაკითხონ ალტერნატიულ კლინიკებს, მაგალითად, რესპუბლიკურ საავადმყოფოს“, - განაცხადა არჩილ ჩუხრუკიძემ.
მწვავე პაციენტების მიღებას აგრძელებს „ჯოენის სამედიცინო ცენტრიც“, თუმცა, საავადმყოფოს სახელმწიფოს მიერ კლინიკებისთვის ტარიფების გათანაბრების გამო გეგმიური პაციენტების მიღება გაურკვევლი დროით აქვს შეჩერებული. კლინიკაში ფიქრობენ იმაზეც, რომ საერთოდ დარჩებიან თუ არა საყოველთაო ჯანდაცვის პროგრამაში.
„520-ე დადგენილების შედეგი სახეზე გვაქვს, საავადმყოფოებმა გეგმიური ოპერაციები შევწყვიტეთ, უფრო სწორედ, სახელმწიფომ შეგვაწყვეტინა. ოპერაციები როდის განახლდება რთული სათქმელია. დეკემბრის ბოლომდე უნდა მივიღოთ გადაწყვეტილება დავრჩებით თუ არა პროგრამაში. გადაუდებელ ოპერაციებს ვემსახურებით, კლინიკის ხარჯზე, გადაუდებელ პაციენტს ფულს ვერ მოვთხოვთ. კლინიკები კიდევ ერთი პრობლემის წინაშე ვდგავართ, ეს არის ჩარიცხვები, 2 დღის წინ ივნისის თანხა ჩაგვირიცხეს. წარმოიდგინეთ მას შემდეგ კიდევ 5 თვის თანხაა ჩასარიცხი. სამინისტროს დადგენილი ვადები აქვს, თუმცა ამ ვადებს დიდი ხანია გასცდნენ“- აცხადებს ვახტანგ ლაშხი.
წყარო: კომერსანტი