საზოგადოება

4-5 ძირითადი ქრონიკული დაავადების სამკურნალო მედიკამენტებს საქართველოს 600 000-მდე მოქალაქე უფასოდ მიიღებს

დღეს ჯანდაცვის მინისტრი დავით სერგეენკო ფარმაცევტული კომპანიების წარმომადგენლებს შეხვდა. განიხილეს საყოველთაო ჯანდაცვის პროგრამის მეორე ეტაპის ახალი კომპონენტის, სამი სახეობის მედიკამენტების: გულსისხლძარღვთა სისტემის, ენდოკრინოლოგიის ნაწილისა და სასუნთქი სისტემის დაავადებებისათვის საჭირო წამლების დაფინანსდება.

„ძალიან მალე ავამოქმედებთ კიდევ ერთ სახელმწიფო პროგრამას, რომელიც მოიცავს, პირველ ეტაპზე, 4-5 ძირითადი ქრონიკული დაავადების სამკურნალო მედიკამენტების მიწოდებას. მათ შორის, საუბარია გულსისხლძარღვთა სისტემის პრობლემების (მაღალი წნევა, გულის უკმარისობა, კორონალული სისხლძარღვების დაავადება), ენდოკრინოლოგიური დაავადებებისა (დიაბეტის მეორე ტიპი და ფარისებრი ჯირკვლის დაავადებები) და ბრონქალიური ასთმისა და ფილტვების ქრონიკულ ობსტრუქციულ დაავადებებზე“, - განაცხადა სერგეენკომ.

30-მდე დასახელების მედიკამენტს უფასოდ მიიღებს საქართველოს 600 000-მდე მოქალაქე, ძირითადად სოციალურად დაუცველები და მარტოხელა პენსიონერები.

სერგეენკოს განცხადებით, პროგრამა ითვალისწინებს ხარისხის სტანდარტების დაწესებას ფარმაცევტული კომპანიების ლაბორატორიებისთვის.

„რაც შეეხება ბიუჯეტს, პირველ ეტაპზე ვფიქრობთ, რომ ეს იქნება 5 მილიონი ლარის ფარგლებში. პროგრამა განხორციელდება შემდეგნაირად: სახელმწიფო აცხადებს სახელმწიფო შესყიდვას; აწესებს ხარისხის ერთ-ერთ ყველაზე მაღალ სტანდარტს, რაც არის ჯანდაცვის მსოფლიო ორგანიზაციის მიერ აკრედიტებული ლაბორატორიის ხარისხის კონტროლის სერთიფიკატი ამა თუ იმ მედიკამენტებისთვის“, - განაცხადა ჯანდაცვის მინისტრმა.

მისივე განმარტებით, ლაბორატორიულ კონტროლი პირველ ეტაპზე განხორციელდება უცხოურ ლაბორატორიებში, რადგან საქართველოში მსგავსი ლაბორატორია არ არსებობს. სერგეენკოს თქმით, გამოცხადდება საერთაშორისო ტენდერი და პირობები იქნება თანაბარი, როგორც საქართველოს ფარმაცევტული კომპანიებისთვის, ასევე საერთაშორისო კომპანიებისთვის.

საყოველთაო ჯანდაცვის პროგრამის ფარგლებში ახალი მედიკამენტების კომპონენტი, სავარაუდოდ, ივნისის მეორე ნახევარში ამოქმედდება.

ანა მებურიშვილი