პოლიტიკა
4 თებერვალს პარლამენტთან დაგეგმილი აქციის შესახებ თბილისის მერიას ოფიციალური წერილით მიმართეს
„ევროპულმა საქართველომ“ თბილისის მერიას 4 თებერვალს პარლამენტის შენობასთან დაგეგმილი აქციის შესახებ ოფიციალური წერილით მიმართა. ამის შესახებ პარტიის წევრმა, ირაკლი კიკნაველიძემ განაცხადა.
„4 თებერვალს გრძელდება ის პროტესტი, რომელიც დაიწყო ბიძინა ივანიშვილის სამარცხვინო გადაწყვეტილების შემდეგ, როდესაც მან გადააგდო ქართველი ხალხი და არ შეასრულა მისი დაპირება პროპორციული არჩევნებთან დაკავშირებით.
4 თებერვალს ყველა ის ოპოზიციური პარტია და სამოქალაქო ჯგუფი, ვინც აქტიურად იყო ჩართული ამ პროტესტში, ხელახლა დავუბრუნდებით ამ პროცესს. სირცხვილის კორიდორებით და პიკეტირების გზით ჩვენ ვაპირებთ, რომ დისკომფორტი შევუქმნათ ხელისუფლების იმ სამარცხვინო წარმომადგენლებს, რომლებსაც ჰგონიათ, რომ ისევ ჩვეულებრივად გააგრძელებენ ხელისუფლებაში ყოფნას, როგორც ეს აქამდე იყო. ეს ასევე არ იქნება და მათ მოუწევთ დიდი დისკომფორტის გავლა. ჩვენ მივმართავთ მერიას ამის შესახებ და მათ ინფორმირებას ვახდენთ. ჩვენ ვალდებულება მათი ინფორმირების არ გვაქვს, ეს ჩვენი კეთილი ნებაა - თუ მათ მიაჩნიათ, რომ ტექნიკურად რაიმეა მოსაგვარებელი, რაც ხელს შეუშლის ამ ტიპის დემონსტრაციების გამართვას, მოაგვარონ.
ეს წერილი არის უფრო სიმბოლური, ვიდრე რაიმე ტიპის ტექნიკური დანიშნულების მქონე,- განაცხადა ირაკლი კიკნაველიძემ.