პოლიტიკა
600 000 მოქალაქისთვის ვალების ჩამოწერის ფართომასშტაბიანი აქცია შეიძლება მივიჩნიოთ ამომრჩეველთა ხმების ყიდვად - ნატო-ს საპარლამენტო ასამბლეის დელეგაციის ხელმძღვანელი
ნატო-ს საპარლამენტო ასამბლეის დელეგაციის ხელმძღვანელმა ლაიმა ლიუსია ანდრიკიენემ საქართველოს საპრეზიდენტო არჩევნების მეორე ტურის შეფასებისას განაცხადა, რომ წინასაარჩევნო კამპანია ძალიან ნეგატიური იყო.
„გვიხარია იმის თქმა, რომ სერიოზული ინციდენტები არ აღინიშნა არჩევნების დღეს, თუმცა მინდა ხაზი გავუსვა, რომ ზოგიერთი ელემენტი, რომელიც პირველ რაუნდში გავაჟღერეთ, სამწუხაროდ, კვლავ აქტუალურია. ჩვენ ძალზე გვაშფოთებს ნეგატიური კამპანია და მძაფრი ბრალდებები კანდიდატების მხრიდან. 28 ოქტომბერს ეს გაუარესდა, მათ მიაღწიეს მიუღებელ დონეს, რომელმაც შეიძლება რისკი შეუქმნას დემოკრატიის კონსოლიდაციას ქვეყანაში, რომელსაც ამ რეგიონში ლიდერად მივიჩნევთ“, - განაცხადა ანდრიკიენემ.
მან ასევე აღნიშნა, რომ ინიციატივა, რომელიც ითვალისწინებს შავ სიაში მყოფი მოქალაქეებისთვის ვალის ჩამოწერას, შეიძლება იყოს მიჩნეული ამომრჩეველთა მოსყიდვად.
„მჯერა, რომ საქართველოს არჩეული პრეზიდენტი გამოთქვამს სურვილს და შეძლებს გაამთლიანოს, შეარიგოს ერი, რათა ქვეყანამ თვალი გაუსწოროს იმ ბევრ გამოწვევას, რომელიც მის წინაშე დგას.
ევროკავშირისკენ გზაზე საქართველოს სჭირდება ჭეშმარიტი, დემოკრატიული, არაკონფრონტაციული დიალოგი ყველა მონაწილე მხარეს შორის, რათა პოლიტიკური სტაბილურობა დავიცვათ. ის ფაქტი, რომ ამომრჩევლებმა ვერ შეძლეს კენჭისყრა ოკუპირებულ ტერიტორიებზე, ასევე დიდი შეშფოთების საგანია. ამ მოქალაქეთა დავიწყება და მათი ბედის ანაბარად მიტოვება არ შეიძლება. თარიღის არჩევა მეორე რაუნდის კენჭისყრისთვის არ გამოხატავდა ყველა ამომრჩევლის ინტერესს და ინკლუზიურადაც ჩატარდა, რამაც აღძრა ეჭვები, რომ პოლიტიკურად მოტივირებული იყო.
დიდი სიურპრიზი იყო, როდესაც შევიტყეთ 600 000 მოქალაქისთვის ვალების ჩამოწერაზე. ჩვენ გვესმის, რომ ეს ხანგრძლივი პროცესის შედეგი იყო, მაგრამ ფაქტმა, რომ ასეთი სერიოზული პოლიტიკური და ფინანსური გადაწყვეტილება გამოცხადდა საკამათო მეორე რაუნდის წინ რამდენიმე დღით ადრე, თანაც იგი მმართველი პარტიის თავმჯდომარის ორგანიზაციის სახელით გაჟღერდა, გარკვეული ეჭვი შეიტანა ამომრჩეველთა გონებაში. ეს წარმოშობს სამართლებრივ ეჭვს, თუ რა არის ამ ნაბიჯის ჭეშმარიტი განსაზღვრება. ეს ფართომასშტაბიანი აქცია შეიძლება მივიჩნიოთ ამომრჩეველთა ხმების ყიდვად. როგორც ჩვენ ერთობლივ განცხადებაში აღვნიშნავთ მეტი სინათლე სჭირდება ასეთ საკითხს, როგორიცაა ვალების ჩამოწერა“, - განაცხადა ანდრიკიენემ.