საზოგადოება
63,73 გრამი და 150,72 გრამი კანაფის მოხმარება-მოყვანის გამო თავისუფლების აღკვეთა საკონსტიტუციო სასამართლომ არაკონსტიტუციურად ცნო
საქართველოს საკონსტიტუციო სასამართლოს პირველმა კოლეგიამ დააკმაყოფილა მოქალაქეების: ჯამბულ გვიანიძის, დავით ხომერიკისა და ლაშა გაგიშვილის სარჩელები პარლამენტის წინააღმდეგ.
სასამართლომ არაკონსტიტუციურად ცნო საქართველოს კონსტიტუციის მე-17 მუხლის მე-2 პუნქტთან მიმართებით სისხლის სამართლის კოდექსის ის ნორმები, რომლის მიხედვით, 63,73 გრამი, 150,72 გრამი და 265,49 გრამი ნარკოტიკული საშუალების შემცველი მცენარის - კანაფის უკანონოდ, პირადი მოხმარების მიზნით დათესვისთვის, მოყვანისთვის ან კულტივირებისთვის გათვალისწინებულია თავისუფლების აღკვეთა.
სასამართლოს გადაწყვეტილებით, 63,73 გრამი და 150,72 გრამი კანაფი არ შეიძლება ჩაითვალოს იმ ოდენობად, რომელიც ქმნის მისი გავრცელება-რეალიზაციის ავტომატურ საფრთხეს.
რაც შეეხება 265,49 გრამი კანაფის დათესვასა და მოყვანას, საკონსტიტუციო სასამართლოს პირველი კოლეგია იმ დასკვნამდე მოვიდა, რომ 6-დან 12 წლამდე თავისუფლების აღკვეთა არაპროპორციული სასჯელია.
„სასამართლომ მიიჩნია, რომ 265,49 გრამი კანაფის დათესვა და მოყვანა აჩენს მისი გავრცელების მაღალ რისკებს. ამიტომ, აღნიშნული ოდენობის კანაფის მოყვანისათვის სასჯელის სახედ თავისუფლების აღკვეთის გამოყენება დასაშვებია და ემსახურება სხვა პირთა ჯანმრთელობის დაცვას. მიუხედავად ამისა, საქართველოს სისხლის სამართლის კანონმდებლობით გათვალისწინებული სხვა უფრო მძიმე დანაშაულებისთვის დაწესებული სასჯელების შედარებითი ანალიზის საფუძველზე, სასამართლო მივიდა დასკვნამდე, რომ 265,49 გრამი კანაფის მოყვანისთვის დაწესებული სასჯელის კონკრეტული ზომა - თავისუფლების აღკვეთა ექვსიდან თორმეტ წლამდე არის აშკარად არაპროპორციული სასჯელი“, - ნათქვამია საკონსტიტუციო სასამართლოს მიერ გავრცელებულ ინფორმაციაში.