პოლიტიკა
7% ვის მიჰქონდა, ვინ იყვნენ ეს ბიჭები? - გიორგი ფანცულაია “ომეგა ჯგუფის” საქმეზე
„ომეგა ჯგუფისა“ და ტელეკომპანია „იბერიას“ ადვოკატის გიორგი ფანცულაიას განცხადებით, ინფორმაციას თბილისის პროკურატურის მიერ მიმდინარე გამოძიებაზე „ომეგა ჯგუფის“ მხარე მიიღებს მას შემდეგ, რაც ის იქნება აღიარებული სამართლებრივად დაზარალებულად.
ადვოკატმა უკმაყოფილება გამოთქვა, რომ პასუხისმგებლობის გადატანას მხოლოდ სპორტისა და ახალგაზრდობის ყოფილ მინისტრზე, ლევან ყიფიანზე ცდილობენ.
„დღეის მდგომარეობით გვაქვს ასეთი სიტუაცია. დაახლოებით 2 კვირა გავიდა, რაც პირველი ჩანაწერი იყო გასაჯაროებული. კიდევ ერთხელ ვიმეორებ, ხაზს ვუსვამ, ამ ჩანაწერებს, უპირველეს ყოვლისა, სჭირდება ექსპერტიზა, მაგრამ ჩანაწერების გამოქვეყნების შემდეგ ამ ჩანაწერებში მყოფი ან ნახსენები ადამიანებისგან ჩვენ პრაქტიკულად ვისმენთ, ზოგიერთი ადასტურებს კიდევაც ამ ჩანაწერის არსებობას.
ისმის ისეთი რაღაც, რომ მაქსიმალურად მათი დისტანცირება მოხდეს და მთავარი პასუხისმგებლობის გადატანა მოხდეს ლევან ყიფიანზე.
ზუსტად ანალოგიურს აკეთებს გამოძიება, რომ დღეის მდგომარეობით ლევან ყიფიანის გარდა აბსოლუტურად არავინ არაა დაკითხული. მიუხედავად იმისა, რომ არაერთი პირი იყო გაჟღერებული ამ საქმეში და პლუს ამას, კვლავ ჯიუტად, როგორც ვხედავთ, განსხვავებული პოზიცია პროკურატურას არ დაუფიქსირებია, რაც თავდაპირველად გააკეთა განცხადება, რომ თაღლითობის მუხლით დავიწყეთ გამოძიებაო. ესე იგი კვლავ ჯიუტად ცდილობს პროკურატურა და პროკურატურასთან ერთად ამ ჩანაწერებში ასოცირებული ან ნახსენები ადამიანები, რომ მთავარი პასუხისმგებლობა განაწილდეს ლევან ყიფიანზე.
არცერთ შემთხვევაში არ ვარღვევ არავის უდანაშაულობის პრეზუმციას და მით უმეტეს, პირველი დღიდან იმას ვამბობ, რომ ჩვენი მიზანია, გამოძიებამ დაადგინოს სიმართლე და ჩაატაროს ექსპერტიზები. ბოლოს და ბოლოს, რა უჯდება სახელმწიფოს სამხარაულის ექსპერტიზაზე ან სადმე, რომელიმე ექსპერტიზის ბიუროს დაუკვეთოს ამ ჩანაწერებზე ექსპერტიზის ჩატარება. ამ შემთხვევაში, გამოიკვეთება ეს რეალური ვითარება.
მინდა, ერთ მნიშვნელოვან დეტალს შევეხო. ბატონი ზაზა ოქუაშვილი საუბრობდა, რომ ის 50%, ფონდი ყოფილა თურმე, რომ გადაუხდელი თანხები უნდა გადაეხადა ამ გზით კომპანიას, მაგრამ ძალიან მაინტერესებდა, ძალიან გულდასმით ვისმენდი, თუ ახსენებდა რომელიმე პირს, ვინც ჩანაწერებში ისმის. 7% ვის მიჰქონდა, ვინ იყვნენ ეს ბიჭები? “, - აღნიშნა ფანცულაიამ.