საზოგადოება
8 მარტს სტრასბურგის სასამართლოში ვანო მერაბიშვილის საქმის ზეპირი განხილვა გაიმართება
საპარლამენტო ფრაქცია „ევროპული საქართველოს“ წევრის ოთარ კახიძის ინფორმაციით, 8 მარტს ევროპული სასამართლოს დიდ პალატაში შინაგან საქმეთა ყოფილი მინისტრის, ვანო მერაბიშვილის საქმის ზეპირი განხილვა გაიმართება. ამის შესახებ მან ფეისბუკის საკუთარ გვერდზე დაწერა.
კახიძე ვანო მერაბიშვილის ადვოკატია. მისი თქმით, თეა წულუკიანმა მისწერა სტრასბურგის სასამართლოს, რომ კახიძემ არ უნდა წარადგინოს მერაბიშვილი იმის გამო, რომ ის პარლამენტის წევრია.
„ევროპული საქართველოს“ წევრის თქმით, სასამართლომ წულუკიანის მოთხოვნა არ დააკმაყოფილა.
„მტკიცებულებათა წარდგენა დავასრულეთ თუ არა, თეა წულუკიანმა სასამართლოს მისწერა - ოთარ კახიძე პარლამენტის წევრი გახდა, ადვოკატი აღარ არის და ყველა მტკიცებულება, რომელიც წარმოგიდგინათ, დაუშვებლად სცანითო. ადვოკატთა ასოციაციის წევრობა არ არის აუცილებელი იმისათვის, რომ დაიცვა ადამიანის უფლება და წარმოადგინო განმცხადებელი სტრასბურგის სასამართლოში. ეს იციან კვალიფიციურმა იურისტებმა, მაგრამ არ იცოდა თეა წულუკიანმა. სასამართლოს პრეზიდენტმა არ დააკმაყოფილა იუსტიციის სამინისტროს მოთხოვნა, ჩემი გაგზავნილი მტკიცებულებები დაშვებულია და მე კვლავ წარმოვადგენ ვანო მერაბიშვილის ინტერესებს”,- განაცხადა კახიძემ
შეგახსენებთ, რომ სტრასბურგის სასამართლომ უნდა განიხილოს 2016 წლის 21 ივნისს სასჯელაღსრულების დაწესებულების საკნიდან ვანო მერაბიშვილის შესაძლო გაყვანის ფაქტი. 22 თებერვალს საქართველოს მთავარმა პროკურატურამ გაავრცელა ინფორმაცია, რომ ამაზე გამოძიება დაასრულა და ამ ფაქტის ჩადენა არ დადასტურდა.
ანა მებურიშვილი