საზოგადოება

აფგან მუხთარლი ქართული მედიისთვის მიცემული ინტერვიუს გამო ციხეში დაგეგმილზე ადრე მიაბრუნეს - ხადიჯა ისმაილოვა

აზერბაიჯანელი ჟურნალისტის, ხადიჯა ისმაილოვას ინფორმაციით, მისი კოლეგა აფგან მუხთარლი რუსთავი 2-სთვის მიცემული ინტერვიუს გამო ციხეში დაგეგმილზე ადრე მიაბრუნეს.

„აფგან მუხთარლი მოულოდნელად ციხეში მიაბრუნეს ქართული და აზერბაიჯანული მედიისთვის მიცემული ინტერვიუების გამო. რუსთავი 2-თან მან ისაუბრა ყველაფერზე: ილჰამ ალიევისა და ბიძინა ივანიშვილის ბიზნესინტერესზე, როგორ გაიტაცეს საქართველოს კრიმინალური პოლიციის თანამშრომლებმა (რაც ნიშნავს, რომ საქართველოს შს მინისტრი იყო ჩართული გატაცების ოპერაციაში) და მან განაცხადა, რომ მის გატაცებას აკონტროლებდა საქართველოს მოქმედი პრემიერ-მინისტრი გიორგი კვირიკაშვილი. საქართველოს პროკურატურამ უკმაყოფილება გამოთქვა, რომ აზერბაიჯანული ხელისუფლება აფგანის ინტერვიუს ხელმისაწვდომს არ ხდის. ჩვენ ეს მოვახერხეთ თქვენთვის. და ეს ინტერვიუები უნდა იყოს აღიარებული აფგანის მიერ მიცემულ ჩვენებად. ჩვენ არ გვსმენია საქართველოს პარლამენტისგან აფგანის მიმართვაზე საპარლამენტო კომისიის შექმნის შესახებ, რომელიც ამ საქმეს გამოიძიებდა. ეს იმიტომ, რომ ქართულმა სახელმწიფო უწყებებმა დამალეს და გააყალბეს ფაქტები, გარდა ამისა უმაღლესი ოფიციალური პირები იყვნენ ჩართული გატაცებაში. ორივე, საქართველოსა და აზერბაიჯანის ხელისუფლებები არიან პასუხისმგებლები აფგანის გატაცებაში. რამდენ ხანს გაგრძელდება ორივე მთავრობის მიერ სირაქლემებივით სილაში თავის მალვა?“, - დაწერა ისმაილოვამ ფეისბუკის საკუთარ გვერდზე.

ცნობისთვის, მუხთარლი 2 დღით გაუშვეს ზაქათალაში, რათა ის დასწრებოდა მისი დის, დისშვილისა და ძმისშვილის ორმოცს.

აფგან მუხთარლი თბილისში 29 მაისს გაუჩინარდა, შემდგომ გაირკვა, რომ ის აზერბაიჯანში დააკეს. ბელაქნის სასამართლომ საზღვრის უკანონოდ გადაკვეთის, საზღვარზე 10,000 ევროს არადეკლარირებულად გადატანასა და მესაზღვრისთვის წინააღმდეგობის გაწევის გამო, 6 წლით თავისუფლების აღკვეთა მიუსაჯა.