საზოგადოება

აფრიკის დასახლებაში ნაპოვნი ცხედრის ნაწილების წარმომავლობის დასადგენად გამოძიება დაიწყო

აფრიკის დასახლებაში ნაპოვნი ცხედრის ნაწილების წარმომავლობის დასადგენად გამოძიება დაიწყო.

გამოძიებამ უნდა დაადგინოს, ცხედრის ნაწილები ძაღლებმა უპატრონო მიცვალებულის საფლავიდან ამოთხარეს, თუ ამპუტირებული ორგანოების საცავიდან.

შემთხვევა აფრიკის დასახლებაში, ე.წ. სავანის სასაფლაოს მიმდებარედ მოხდა, სადაც ადგილობრივებმა ცხედრის კიდურები იპოვეს, რომლებსაც ძაღლები ხრავდნენ.

აღნიშნულ ტერიტორიაზე არის როგორც უპატრონოთა სასაფლაო, ისე საავადმყოფოდან მოტანილი სხეულის ნაწილებიც იმარხება.

როგორც ადგილობრივები ამბობენ, ტერიტორია ადრე შემოღობილი იყო, თუმცა შემდეგ გაძარცვეს და ახლა ღობის გარეშეა დარჩენილი.

დამკრძალავი ბიურო "ჰერმესის" დირექტორი ამბობს, რომ ისინი პროცედურის ნორმების სრული დაცვით ახორციელებენ სხეულის ნაწილების დაკრძალვას.

„გამოძიებამ უნდა დაადგინოს, რასთან გვაქვს საქმე. დასაზუსტებელია, ეს იყო თუ არა იმ ადგილიდან ინციდენტი, სადაც იკრძალება ჩვენს მიერ სამედიცინო ნარჩენები.

რაც შეეხება პროცედურას, ჩვენ შესაბამისი პროცედურის დაცვით ვახორციელებთ აღნიშნულს. დანარჩენს გაარკვევს გამოძიება“-აცხადებს შპს "ჰერმესის" დირექტორი მიხეილ ძაგანია ,,რუსთავი 2“-თან საუბარში.