საზოგადოება

აღიაროს სახელმწიფომ თავისი შეცდომა და დასაჯონ ეს ხალხი - თემირლან მაჩალიკაშვილი რამადანის თვის დასრულების შემდეგ პანკისის ხეობაში აქციებს აანონსებს

პანკისის ხეობაში ჩატარებული სპეცოპერაციის შედეგად დაღუპული თემირლან მაჩალიკაშვილის მამის, მალხაზ მაჩალიკაშვილის თქმით, ქუჩაში დგომა სიმართლის დადგენის ერთადერთ გზად დარჩა.

მისი თქმით, პრემიერმა თემირლან მაჩალიკაშვილის საქმეზე რეაგირებას დაპირდა, თუმცა მას არ ასრულებენ. მაჩალიკაშვილმა იმის გამოც გამოთქვა უკმაყოფილება, რომ ხორავას ქუჩის საქმეზე შექმნილი დროებით საპარლამენრტო საგამოძიებო კომისიაში მისი შვილის დაღუპვაზე არ საუბრობენ.

„შექმნილი ხომ იყო საგამოძიებო ჯგუფი, საერთოდ, სიტყვას არ ახსენებენ თემირლან მაჩალიკაშვილზე. დაპირება იყო, მაგრამ რეაგირება არაა. დამპირდა გიორგი კვირიკაშვილი, რომ ყველაფერს გააკეთებს ამ საქმის გამოძიებისთვის და მას შემდეგ არავინ დაგვკავშირებია. უნდა განხილულიყო მაჩალიკაშვილის საქმეც. ეს არის პირდაპირ სახელმწიფოს დანაშაული, ისეთი დანაშაული, რომლის გამოსწორება არ შეიძლება“, – განაცხადა მალხაზ მაჩალიკაშვილმა.

მალხაზ მაჩალიკაშვილის განცხადებით, შვილის სიკვდილზე უფრო ძნელი გადასატანი აღმოჩნდა თემირლან მაჩალიკაშვილის ტერორიზმში დადანაშაულება.

„ამ უსასტიკესი დანაშაულის გადასაფარად რომ გამოაცხადეს ჩემი შვილი ტერორიზმში ეჭვმიტანილად, ეს არის ჩემთვის მის სიკვდილზე მეტი. მე მათ ვეუბნები, აღიარონ მისი უდანაშაულობა, აღიაროს სახელმწიფომ თავისი შეცდომა და დასაჯონ ეს ხალხი, ვინც ჩაიდინა ჩემთან ეს ტერაქტი. მე არ ვარ ტერორისტი, ისინი არიან ტერორისტები“, – განაცხადა მალხაზ მაჩალიკაშვილმა.

მაჩალიკაშვილმა რამადანის თვის დასრულების შემდეგ პანკისში აქციების დაწყება დააანონსა.