საზოგადოება

აგრესიაზე გადმოდიან და ხელს გვიშლიან - კომპანიის ადვოკატი მახინჯაურის ინციდენტზე

მახინჯაურის სანაპიროზე ასწლოვანი ტიტას ხის გადატანას ხმაური მოჰყვა. აღნიშნული სამუშაოების განმახორციელებელი კომპანია „გზის“ ადვოკატის არჩილ ბასილაძის განცხადებით, „ერთიანი ნაციონალური მოძრაობის“ წევრები სამუშაოების წარმოებაში ხელს უშლიან.

ბასილაძის თქმით, ენმ-ის წევრები მოითხოვენ ადგილზევე სამუშაოების ჩატარების ნებართვის წარდგენას.

„კომპანია „გზა“ ახორციელებს ხის გადატანით სამუშაოებს. ვეუბნები, წარმოგიდგენთ დოკუმენტაციას-მეთქი, ტერიტორიას არ ტოვებენ, ავუხსენი და განვუმარტე, რომ ნებისმიერი სახის ნებართვა, რასაც თქვენ ითხოვთ, მაქვს, ოღონდ ადგილზე არა, სამუშაო ადგილზე. ვერ გავიგე, ტრაქტორიც უნდა იყოს და ნებართვა ვის უნდა ჰქონდეს. წამობრძანდით ოფისში და გაჩვენებთ-მეთქი. აგრესიაზე გადმოდიან, ხელს გვიშლიან, არ ტოვებენ ტერიტორიას, ცდილობენ, ხელი შეგვიშალონ სამუშაოების წარმოებაში. ამავე დროს პასუხისმგებლობა გვაქვს აღებული კომპანიასთან, შევასრულოთ სამუშაოები და გარკვეულ დროში გადავიტანოთ ხე“, - განაცხადა ბასილაძემ.

აჭარის ტელევიზიის ინფორმაციით, დაზიანდა საქართველოს რკინიგზის ინტერნეტსადენი, რომელიც მახინჯაურის სანაპიროზე გადიოდა, თუმცა გახდა თუ არა მისი დაზიანების მიზეზი ხის გადატანითი სამუშაოები, ჯერჯერობით დაზუსტებული არაა.

ანა მებურიშვილი