პოლიტიკა
ახალმიღებულ კონსტიტუციაში გათვალისწინებული მოქალაქეობის საკითხი ამოქმედდება ამ დოკუმენტის გამოქვეყნებისთანავე
პარლამენტის თავმჯდომარის, ირაკლი კობახიძის განცხადებით, ახალმიღებულ კონსტიტუციაში გათვალისწინებული მოქალაქეობის საკითხი ამოქმედდება არა 2018 წლის ნოემბერში, არამედ ახალი რედაქციის გამოქვეყნებისთანავე.
ცვლილება გულისხმობს, რომ სხვა ქვეყნის მოქალაქეობის მიღებით მოქალაქე ავტომატურად არ დაკარგავს საქართველოს მოქალაქეობას.
„ახალი რედაქციის კონსტიტუციით, სხვა ქვეყნის მოქალაქეობის შეძენა აპრიორი საქართველოს მოქალაქობის დაკარგვის საფუძველი აღარ არის. იყო შემოთავაზება, რომ შესაბამისი ნორმა აგვემოქმედებინა უფრო ადრე, ვიდრე სხვა რეგულაციები. კონსტიტუციის გარდამავალ დებულებებს შესაბამისი ჩანაწერი ემატება და როგორც კი ცვლილებები გამოქვეყნდება, ამოქმედდება ნორმა მოქალაქეობის თაობაზე“, - თქვა კობახიძემ პარლამენტის პლენარულ სხდომაზე.
ახალი კონსტიტუციით, საქართველოს მოქალაქეობა მოიპოვება დაბადებით ან ნატურალიზაციით. საქართველოს მოქალაქეობის მოპოვებისა და დაკარგვის წესი, სხვა სახელმწიფოს მოქალაქისთვის საქართველოს მოქალაქეობის მინიჭების პირობები და წესი და საქართველოს მოქალაქის მიერ სხვა სახელმწიფოს მოქალაქეობის ფლობის პირობები ორგანული კანონით განისაზღვრება.
ანა მებურიშვილი