კომენტარი

ახლა რას აპირებთ, აპატურაისაც ბურჯანაძის მსგავსად რუსეთის ინტერესების გამტარებელს დაუძახებთ? - ნინო ბურჯანაძე

ახლა რას აპირებთ, აპატურაისაც ბურჯანაძის მსგავსად რუსეთის ინტერესების გამტარებელს დაუძახებთ თუ აღირებთ, რომ ქართველი ერის გარკვეული ნაწილი უცოდინარ, არაკომპეტენტურ და დროს უიმედოდ ჩამორჩენილ პოლიტიკოსებს არის აყოლილი?!" - ასე ეხმაურება ,,ერთიანი საქართველო- დემოკრატიული მოძრაობის" ლიდერი ნინო ბურჯანაძე ნატო-ს გენერალური მდივნის სპეციალური წარმომადგენლის ჯეიმს აპატურაის განცხადებას.

ბურჯანაძის თქმით, ყველა უბედურების სათავე უვიცობა და უთავმოყვარეობაა.

„საინტერსოა, რას უპასუხებენ დღეს ჯეიმს აპატურაის ამ განცხადებაზე უვიცი და უტიფარი პოლიტიკოსები. გუშინ საქართველოში ლუსტრაცია მოხდა: ნათლად გამოიკვეთა, ვისთვისაა საქართველო და ეროვნული ინტერესები მთავარი, და ვისთვის ნატო-ში ინტეგრაციაზე დემაგოგიით როგორმე პოლიტიკაში დარჩენა! ნათლად გამოჩნდა, ვისთვისაა უმთავრესი ამოცანა ხელისუფლებაში მოსვლა, თუნდაც აფხაზეთის და სამაჩაბლოს სამუდამოდ დაკარგვის ფასადაც კი. სწორედ, ამ უტიფარი პოლიტიკოსების დამსახურებაა, რომ ცხინვალში და სოხუმში დღეს რუსეთის ჯარი დგას! სამწუხაროა, რომ ჩვენი საზოგადოება ასეთ ვაიპატრიოტიზმს ამოფარებულ უვიცებს ხმის ამოღების უფლებას აძლევს. თქვენ ბატონებო, სწორედ თქვენ მიაყენეთ უდიდესი ზიანი ჩვენს ქვეყანას! სწორედ თქვენ დაანახეთ მსოფლიოს, აფხაზებსა და ოსებს, რომ მზად ხართ ნატო-ს სანაცვლოდ საკუთარ მიწაზე - აფხაზეთზე და სამაჩაბლოზე თქვათ უარი! გარწმუნებთ, თქვენნაირ პოლიტიკოსებს და ექსპერტებს ბრიუსელშიც კი სერიოზულად არავინ აღიქვამს და ამას თავადაც ხედავთ. სწორედ ამიტომ გადახვედით ყველანაირ ზღვარს! აი, რა არის ნებსით თუ უნებლიედ, ქვეყნის მტრობა! თქვენ ხართ არშემდგარი პოლიტიკოსები, რომლებიც ქართველ ერს დაკარგული ტერიტორიების საბოლოოდ ჩაბარების სანაცვლოდ, ნატო-ს გარდა ვერაფერს სთავაზობთ. სამარცხვინოდ გამოიყურებით ბატონებო, საქართველოშიც და ქვეყნის გარეთაც, მოყვარესთანაც და მტერთანაც! სირცხვილია! მართლა სირცხვილია!“, - აცხადებს ბურჯანაძე.

შეგახსენებთ, რომ ჯეიმს აპატურაიმ სოციალურ ქსელში დაწერა: „მე ვნახე აზრთა გაცვლა-გამოცვლა ალიანსში საქართველოს გაწევრიანებაზე მეხუთე მუხლის გავრცელების გარეშე ორ რეგიონთან დაკავშირებით. ჩემი აზრით, ამ საკითხზე დისკუსიას ახლა აზრი არ აქვს“.

ნინო ბურჯანაძის აღნიშნულ კომენტარს პარტიის პრესსამსახური ავრცელებს.