საზოგადოება

ალექსანდრე ჯეჯელავა ერთიან ეროვნულ გამოცდებზე - მომავალში ჩვენ უნდა ვიფიქროთ არა ბარიერის დაწევაზე, არამედ მის აწევაზე

შანსი, რომ შემთხვევითი შემოხაზვით ტესტში რომ წარმატებას მიაღწიო არ უნდა არსებობდეს, - განაცხადა განათლების მინისტრმა ალექსანდრე ჯეჯელავამ ,,მაესტროს“ ეთერში ერთიან ეროვნულ გამოცდებზე საუბრისას.

"ტესტებში შემთხვევით რომ შემოხაზო, ან პასტა რომ დაიჭირო და შემთხვევით გადაჯღაბნო ნებისმიერი ვარიანტები, რა ალბათობა გაქვს, რომ მოხვდე? სამწუხაროდ ჩვენი ეროვნული გამოცდების თამასა ჯერ-ჯერობით იმდენად დაბალია, რომ სრულიად შემთხვევით რომ შემოხაზოს რობოტი იქნება ეს, მაიმუნი, თუ ადამიანი 7-ში ერთი შანსი გაქვს რომ "გაარტყამს".

ანუ შანსი, რომ შემთხვევითი შემოხაზვით ტესტში რომ წარმატებას მიაღწიო არ უნდა არსებობდეს. მომავალში ჩვენ უნდა ვიფიქროთ არა ბარიერის დაწევაზე, არამედ მის აწევაზე. შედარებისთვის, გერმანიაში უმაღლეს სასწავლებელში მოსახვედრი გამოცდების ბარიერს ლახავს დაახლოებით 40% მოსწავლეების, ჩვენთან 86%. ან განუზომლად ჭკვიანები ვართ ვიდრე გერმანელები, ან ეს თამასა და ბარიერი გვაქვს ძალიან დაბალი. მე მეორე ვარიანტს ვემხრობი. შესაბამისად, ჩვენ გვჭირდება ისეთი სისტემა სადაც მხოლოდ ის სტუდენტები მოხვდებიან უმაღლეს სასწავლებლებში, ვინც არიან კარგად მომზადებული და ვისაც აქვს მაღალი აკადემიური მზადყოფნა და მოტივაცია", - განაცხადა ჯეჯელავამ.