კომენტარი

ამ პიროვნებებს ტერორისტული ორგანიზაციის წევრობა ედებათ ბრალად - თურქეთის ელჩი

საქართველოში თურქეთის ელჩი ზექი ლევენთ გუმრუქჩუ გამოეხმაურა გავრცელებულ ინფორმაციას იმის შესახებ, რომ ტერორიზმში ბრალდებული პირები, თითქოს თავს საქართველოს საპატრიარქოს აფარებდნენ.

მისი თქმით, ერთ-ერთი ბრალდებულის თურქეთში ექსტრადიცია უკვე მოხდა, მეორე პირის საკითხს კი, უახლოეს დროში სასამართლო გადაწყვეტს.

„ამ პიროვნებებს ტერორისტული ორგანიზაციის წევრობა ედებათ ბრალად და მათი თურქეთში ექსტრადიციის პროცესი თურქული სასამართლოს გადაწყვეტილების საფუძველზე მოხდა.

ჩვენ ქართულ მხარეს ყველა საჭირო დოკუმენტაცია მივაწოდეთ. ორივე პირი საქართველოში სამართალდამცველებმა 2016 წლის გაზაფხულზე დააკავეს.

ერთ-ერთი მათგანი უკვე გადაეცა თურქულ მხარეს. მეორე პირის ექსტრადიციასთან დაკავშირებით კი, პროცესი ამ დრომდე მიმდინარეობს და ვფიქრობ, სასამართლოს გადაწყვეტილებას ჩვენ უახლოეს მომავალში შევიტყობთ“,- აღნიშნა ზექი ლევენთ გუმრუქჩუმ რუსთავი2-თან საუბარში.

შეგახსენებთ, ტელეკომპანია რუსთავი 2-ის ინფორმაციით, ვაკეში, მცხეთის ქუჩაზე მდებარე რეზიდენციაში, რომელიც ილია მეორეს ეკუთვნის, 2016 წლის აპრილში, ტერორიზმში, ადამიანების გატაცებასა და მკვლელობაში ბრალდებულ ძებნილებს მალავდნენ. ამის მტკიცებულებად ტელეკომპანიამ ილია მეორის დაცვის ყოფილ უფროსის, სოსო ოხანაშვილის ჩვენების აუდიოჩანაწერი გაავრცელა.

მონიკა დავლიანიძე