საზოგადოება

ამაში ტრაგიკულს ნურაფერს ხედავთ, თუ ვიღაც ვიღაცასთან ისაუბრებს - მეუფე იაკობი

პატრიარქის ქორეპისკოპოსმა, მეუფე იაკობმა კომენტარი გააკეთა საქართველოს საპატრიარქოს დელეგაციის მიერ მოსკოვში გამგზავრებასთან დაკავშირებით. მან ჟურნალისტებს უთხრა, რომ ვიზიტის ფარგლებში აფხაზეთის საკითხზე იმსჯელებენ.

მეუფე იაკობის განმარტებით, ამ შეხვედრების დროს მიღებული გადაწყვეტილება სახელმწიფოსა და ეკლესიის ინტერესებს უნდა შეესაბამებოდეს.

„როდესაც რაღაც საკითხებია, ჯგუფები უნდა შეიკრიბონ და იმსჯელონ. შემდეგ ჩვენ ეკლესიაშიც განვიხილავთ. სახელმწიფო ინტერესებსაც უნდა უთანხმდებოდეს და ეკლესიის ინტერესებსაც. ამაში ტრაგიკულს ნურაფერს ხედავთ, თუ ვიღაც ვიღაცასთან ისაუბრებს. გააჩნია, რა შედეგები მოჰყვება. ეს ჯგუფი არ იქნება იმ უფლებამოსილებით, რომ თავად გადაწყვიტოს საკითხები. პატრიარქთან შეთანხმების გარეშე, ვერავინ ვერაფერს გააკეთებს“,- თქვა პატრიარქის ქორეპისკოპოსმა.

ქართული დელეგაცია პატრიარქის ქორეპისკოპოსის, ახალციხისა და ტაო კლარჯეთის მიტროპოლიტ თეოდორე ჭუაძის ხელმძღვანელობით მოსკოვში პატრიარქობის აღდგენის 100 წლის იუბილისადმი მიძღვნილ ღონისძიებებს დაესწრება. პატრიარქ კირილეს მიპატიჟების მიუხედავად, მოსკოვში ჯანმრთელობის მდგომარეობის გამო ვერ მიდის ილია მეორე. ვიზიტში მონაწილეობას არ მიიღებს არც მისი მოსაყდრე, მეუფე შიო მუჯირი.

ანა მებურიშვილი