კონფლიქტის ზონა
ანატოლი ბიბილოვმა ბაშარ ალ-ასადი ცხინვალში დაპატიჟა
ოკუპირებული სამხრეთ ოსეთის დე-ფაქტო პრეზიდენტმა ანატოლი ბიბილოვმა სირიის მმართველი ბაშარ ალ-ასადი ცხინვალში დაპატიჟა. ამის შესახებ ბიბილოვის პრესსამსახური იუწყება.
ოკუპირებული ცხინვალის დე-ფაქტო პრეზიდენტი სირიის რესპუბლიკის დელეგაციას ეკონომიკისა და საგარეო ვაჭრობის მინისტრის, სამერ ალ-ჰამილის ხელმძღვანელობით იალტის საერთაშორისო ეკონომიკურ ფორუმზე შეხვდა.
„ყურადღებით ვადევნებთ თვალს სირიაში მიმდინარე მოვლენებს. "სამხრეთ ოსეთის" მოსახლეობა თანაუგრძნობს სირიელ ხალხს, ვინაიდან კარგად ესმის, რასთან გაქვთ საქმე. დარწმუნებული ვარ, რომ სამართლიანობა იზეიმებს და სირიელი ხალხი კვლავ მშვიდობაში იცხოვრებს. ამაში დიდ წვლილს რუსეთის მიერ გამოყოფილი დახმარებაც შეიტანს“, - თქვა ბიბილოვმა.
დასავლეთი სწორედ ბაშარ ალ-ასადსა და მის მოკავშირე რუსეთს ადანაშაულებს 7 აპრილს, სირიის ქალაქ დუმაში განხორციელებულ სავარაუდო ქიმიურ თავდასხმაში.