საზოგადოება
ანიმაციური სერიალისთვის საუკეთესო, კრეატიული იდეის გამოსავლენად, საქართველოს განათლებისა და მეცნიერების სამინისტრო ატარებს „კრეათონს“
საბავშვო-შემეცნებითი, ანიმაციური სერიალისთვის საუკეთესო, კრეატიული იდეის გამოსავლენად, საქართველოს განათლებისა და მეცნიერების სამინისტრო ატარებს „კრეათონს“, რომლის ფარგლებში, კონკურსის მონაწილეები ერთმანეთს 8 საათის განმავლობაში შეეჯიბრებიან.
განათლების სამინისტროს ინფორმაციით, „კრეათონი“ ორ მიმართულებას მოიცავს - სინოფსისს (შინაარსი, ამბავი) და გმირების, პერსონაჟების ვიზუალური მხარე - ესკიზები (დასაშვებია როგორც ელექტრონული, ასევე ფურცელზე შესრულებული) მსურველებს მონაწილეობა შეეძლებათ როგორც ერთ, ასევე ორივე მიმართულებით, დამოუკიდებლად ან ჯგუფში(ჯგუფის წევრთა რაოდენობა 3 მონაწილეს არ უნდა აღემატებოდეს).
კრეათონში მონაწილეობა ყველა დაინტერესებულ პირს, მათ შორის, სტუდენტებს და 14 წლის ზემოთ ასაკის მოსწავლეებს შეუძლიათ, რომლებიც „კრეათონის“ მსვლელობისას უზრუნველყოფილი იქნებიან კვებით. ამისათვის, 12.07.2017- 19.07.2017 ვადებში, ისინი ვებგვერდზე http://mes.gov.ge/kreatoni/ უნდა დარეგისტრირდნენ. „კრეათონში“ მონაწილეობას მიიღებს დარეგისტრირებული პირველი 100 მსურველი.
კომპეტენტური ჟიურის მიერ გამოვლენილ გამარჯვებულებს, ფულადი ჯილდო, 1000 ლარი გადაეცემა.
„კრეათონი“ არის კონკურსი, სადაც მონაწილეები, მოკლე დროში ინდივიდუალურად ან ჯგუფურად მუშაობენ კონკრეტული დავალების კრეატიულად შესრულებასა და ახალი იდეების გენერირებაზე.