ეკონომიკა

აქ რეალურად სასწორის ერთ პინაზე არის ათასობით ადამიანის სიცოცხლე, ხოლო მეორე მხარეს - რომელიმე სარეკლამო კომპანიის შემოსავლები - დავით სერგეენკო

საქართველოს ჯანდაცვის მინისტრმა დავით სერგეენკომ თამბაქოს მოხმარებისა და რეალიზაციის კონტროლის გამკაცრებაზე საუბრისას განაცხადა, რომ სახელმწიფოსთვის უფრო პრიორიტეტულია მოქალაქეთა ჯანმრთელობა, ვიდრე კერძო კომპანიების ბიზნესინტერესები.

სერგეენკოს თქმით, თამბაქოს მოხმარების შესამცირებლად მიმართულ სტრატეგიაზე მუშაობა 2010 წელს დაიწყო.

„თამბაქოს წინააღმდეგ ბრძოლის სტრატეგიაზე მუშაობა მიმდინარეობდა ბოლო ოთხი წლის განმავლობაში, ეს მოძრაობა დაწყებულია 2010 წელს, როცა მიღებული იქნა თამბაქოს კონტროლის კანონი, თუმცა იქ არ იყო გაწერილი რიგი პარამეტრები, რომელიც მჯერა, რომ ახლა უკვე კანონში ჩაიწერება. რაც შეეხება საკითხს, რომ ბიზნესს პრობლემები ექნება, ჩვენ ყოველთვის გვიწევს გადაწყვეტილებების მიღება. აქ რეალურად სასწორის ერთ პინაზე არის ათასობით ადამიანის სიცოცხლე, ხოლო მეორე მხარეს რომელიმე, თუნდაც ძალიან მნიშვნელოვანი სარეკლამო კომპანიის შემოსავლები. საით გადაიხრება გადაწყვეტილება, ალბათ გასაგებია“, - განაცხადა სერგეენკომ.

სერგეენკომ ჟურნალისტებთან განაცხადა, რომ კერძო სარეკლამო კომპანიების მხრიდან მოყვანილი სტატისტიკის მიუხედავად, ჯანდაცვის სამინისტრო თავის პოზიციას არ შეცვლის.

„თუ ვინმეს, კონკრეტულ სარეკლამო კომპანიას უნდა, რომ ადამიანის სიცოცხლეზე მსჯელობა ციფრებში გადაიყვანოს, მე ამის გაკეთებაც შემიძლია. თუმცა შედარება, რომელიც მოვიყვანე, ვერანაირი ღირებულება მათ შორის, ერთი, ორი ან რამდენიმე კომპანიის ბიუჯეტში შეტანილი მოგების გადასახადი დავუპირისპიროთ ყველაზე უფრო დიდ ღირებულებას - ადამიანის სიცოცხლეს, მგონი, ამაზე მსჯელობაც ზედმეტი იქნება“, - თქვა დავით სერგეენკომ.

შეგახსენებთ, რომ რამდენიმე დღის წინ პარლამენტმა დაასრულა იმ კანონპროექტის საკომისიო მოსმენები, რომელიც ითვალისწინებს საჯარო შენობებში მოწევის აკრძალვას, აგრეთვე, შეზღუდვების დაწესებას აღნიშნული პროდუქციის რეკლამირებასა და რეალიზაციაზე.

ანა მებურიშვილი