საზოგადოება
არ არის სასურველი, რომ წვევამდელი იდგეს ისეთ ადგილას, სადაც მან თავისი გამოცდილების უქონლობით კონფლიქტი გამოიწვიოს - ნოდარ ხარშილაძე
არ არის სასურველი, რომ წვევამდელი იდგეს ისეთ ადგილას, სადაც მან თავისი გამოცდილების უქონლობით კონფლიქტი გამოიწვიოს, - ასე ეხმაურება სამხედრო ექსპერტი ნოდარ ხარშილაძე გუშინ აფხაზეთის საოკუპაციო ხაზთან ახალგაზრდა ჯარისკაცის დაღუპვის ფაქტს.
სამხედრო ექსპერტის შეფასებით, ოკუპირებულ ზონებთან უსაფრთხოებას გამოცდილი კადრები უნდა იცავდნენ და არა წვევამდელები.
“არ არის სასურველი, რომ წვევამდელი იდგეს ისეთ ადგილას, სადაც მან თავისი გამოცდილების უქონლობით კონფლიქტი გამოიწვიოს. ეს უბედური შემთხვევა რაც მოხდა, ჩვენს შორის მოხდა. იგივე რომ მოხდეს რუს ჯარისკაცთან, ამან შეიძლება გართულებები გამოიწვიოს და ჩვენ ხელისუფლებას რუსეთის არ გაღიზიანების პოლიტიკა ჩაუყაროს წყალში და ამიტომ, კარგი იქნება თუ მეტ ყურადღებას მივაქცევთ,“ - განაცხადა ნოდარ ხარშილაძემ.
თავის მხრივ, საქართველოს სამხედრო-საჰაერო ძალების ყოფილი სარდალი ამირან სალუქვაძე აქცენტს კონფლიქტის ესკალაციის რისკზე აკეთებს და შესაბამის ორგანოებს მოუწოდებს, სოფელ მუჟავაში მომხდარი შემთხვევა სრულფასოვნად გამოიძიონ.
„გამოძიება უნდა ჩატარდეს, გამოკვლეული იქნას გარემოებები თუ როგორ და რა ვითარებაში მოხდა. დაუდევრობას ჰქონდა ადგილი, თამაშს ჰქონდა ადგილი თუ არის ასეთი რამ, ცვლის მომზადების დროს ხდება იარაღის შემოწმება და შესაძლოა, მაშინ მოხდა გასროლა და ანარეკლი ტყვია მოხვდა. უამრავი შემთხვევა შეიძლება იყოს, რაზეც პასუხები მხოლოდ და მხოლოდ გამოძიებამ უნდა გასცეს,“ - აცხადებს საქართველოს სამხედრო-საჰაერო ძალების ყოფილი სარდალი ამირან სალუქვაძე.
ცნობისათვის, აფხაზეთის საოკუპაციო ხაზთან დაღუპული ახალგაზრდა ქუთაისის ექსპერტიზის ბიუროდან აბაშაში გადაასვენეს. უბედური შემთხვევა სოფელ მუჟავაში გუშინ მოხდა.