საზოგადოება

„არ დაივიწყო 13 ივნისი!“ - მზიურში წყალდიდობის 2 წლისთავთან დაკავშირებით ღინისძიება გაიმართება

დღეს, საღამოს 9 საათზე, მზიურის ამფითეატრში 13 ივნისის წყალდიდობის 2 წლისთავთან დაკავშირებით გაიმართება ღონისძიება „არ დაივიწყო 13 ივნისი!“.

როგორც აქციის ფეისბუკგვერდზე წერია, ღონისძიების მიზანია, 13 ივნისი სოლიდარობის დღედ იქცეს.

ღონისძიების ორგანიზატორები სთხოვენ ყველა მსურველს, თან წამოიღონ დეკორატიული სანთლები.

„2015 წლის 13 ივნისს მოხდა დიდი ტრაგედია ჩვენს ქალაქში. სტიქიამ 24 ადამიანის სიცოცხლე იმსხვერპლა. ეს იყო დღე, როდესაც 2 ემოცია დაგვეუფლა. პირველი იყო შიში, სტიქიის შიში, რომელიც მარტოს გვტოვებს ბუნებასთან და მეორე- სოლიდარობა, რომელმაც გაგვაერთიანა.

2015 წლის ივნისის მოვლენებიდან ორი წლის თავზე, მეგობრების ჯგუფმა გადავწყვიტეთ, დავამკვიდროთ ტრადიცია და პატივი მივაგოთ გარდაცვლილთა ხსოვნას.

გვსურს, რომ ერთად დავდგეთ კვლავ და ვაქციოთ 13 ივნისი სოლიდარობის დღედ!

დღეს, 12 ივნისს, საღამოს 21 საათზე ყველას გელოდებით მზიურის ამფითეატრში

P.s. ვისაც შეგიძლიათ, წამოიღეთ დეკორატიული სანთლები“, - წერია ღონისძიების ფეისბუკ გვერდზე.

ანა მებურიშვილი