კომენტარი

არ მგონია, რომ პრეზიდენტმა რაღაცნაირად თავის თავი სასამართლოზე ზევით უნდა დააყენოს – ზურაბიშვილი შეწყალებაზე

არ მგონია, რომ პრეზიდენტი უნდა იყოს ადამიანი, რომელიც თავს აყენებს სასამართლო სისტემის ზემოთ და შეუძლია, გაასწოროს ის, რაც არის სასამართლოს მიერ გადაწყვეტილი, – ამის შესახებ ჟურნალისტებს საქართველოს პრეზიდენტმა, სალომე ზურაბიშვილმა დეკანოზ გიორგი მამალაძის შეწყალების მოთხოვნის შესახებ დასმულ კითხვაზე საპასუხოდ განუცხადა.

მისივე თქმით, შეწყალების უფლებაზე საკუთარი დამოკიდებულება აქვს და ამაზე ვრცლად პარლამენტში გამოსვლისას ისაუბრებს. სალომე ზურაბიშვილის განცხადებით, მისი პასუხი ამ შემთხვევაში არა კონკრეტულ საქმეს, არამედ ზოგადად შეწყალების პრაქტიკას ეხება.

„მე სხვანაირად ვფიქრობ საერთოდ შეწყალებაზე. მაქვს ჩემი კონცეფცია. არ მგონია, რომ პრეზიდენტი უნდა იყოს ის ადამიანი, რომელიც რაღაცნაირად თავის თავს აყენებს სასამართლო სისტემის ზემოთ და შეუძლია, გაასწოროს ის, რაც არის სასამართლოს მიერ გადაწყვეტილი. მე წარმოდგენა მაქვს, რომ შეწყალების დისკრეციული უფლება, უნდა იყოს განსაკუთრებული და ძალიან გარკვეულ პირობებში. მე არ გაძლევთ პასუხს კონკრეტულ საკითხზე, გეუბნებით ზოგადად. ამ თემაზე მექნება ვრცელი გამოსვლა, როცა გამოვალ პარლამენტის წინაშე და ავხსნი, თუ როგორ ვხედავ, როგორი როლი უნდა ჰქონდეს პრეზიდენტს და როგორი დამოკიდებულება ამ საკითხის მიმართ“, – განაცხადა სალომე ზურაბიშვილმა.

კითხვაზე, ხომ არ ფიქრობს, რომ შეწყალების საკითხის მიმართ ასეთი მიდგომით შემცირდება შეწყალებულთა რაოდენობა, სალომე ზურაბიშვილმა განაცხადა, რომ ასე უნდა იყოს.

წყარო: “1ტვ“