საზოგადოება
არ მივცეთ უფლება ჩვენს შვილებს, რომ სისხლი დაღვარონ - ხორავას ქუჩაზე მოკლული დავით სარალიძის მამა
„დაე, იყოს ჩემი შვილი მსხვერპლი, რათა ხვალ არ გაგრძელდეს იგივე, ახალგაზრდების მკვლელობა, ჩვენი მომავალი თაობის გაწყვეტა“, – ასე მიმართა ხორავას ქუჩაზე მოკლული მოზარდის დავით სარალიძის მამამ, ზაზა სარალიძემ პარლამენტის შენობის წინ გუშინდელ აქციაზე შეკრებილ ხალხს.
ზაზა სარალიძემ მიმართა აქციის მონაწილეებს, რომ არ დაუშვან ახალგაზრდების სისხლისღვრა.
„დამერწმუნეთ, ჩემი შვილის უკან, ლევან დადუნაშვილის უკან, სხვა ახალგაზრდები დგანან, რომლებიც გამსჭვალულნი არიან შურისძიების სურვილით. არ მივცეთ უფლება ჩვენს შვილებს, რომ სისხლი დაღვარონ. ერთად დავდგეთ, გავერთიანდეთ, რომ სამართალმა პური ჭამოს“, – განაცხადა სარალიძემ.
მისივე ინფორმაციით, ექსპერტიზა ადასტურებს, რომ მკვლელობისას ორი დანის გარდა სხვა საგნებიც იყო გამოყენებული.
„დღესაც მორიგი პროცესი ჩატარდა, იქიდან მოვდივარ პირდაპირ, სადაც თვალნათლივ, პირდაპირ და დადასტურებულად, კატეგორიულად დაადასტურეს ექსპერტებმა, რომ ჩემი შვილის სხეულზე არ იყო გამოყენებული მხოლოდ ის ორი დანა, რომლითაც მას ჭრილობები მიაყენეს და არ იყო გამოყენებული მარტო დანები. იყო გამოყენებული სხვა საგნები, რომლებიც სამხარაულის ექსპერტიზამ პროკურატურის დავალებით დამალა. სამხარაულის ექსპერტიზამ ფაქტობრივად გაანადგურა ერთ-ერთი დანა, რომელზეც აღარ შეიძლება ხელმეორედ ექსპერტიზის ჩატარება. მაქსიმალურად ცდილობენ ჩემს დისკრედიტაციას. როდესაც პროკურორ გუგუშვილს მოთხოვნა წავუყენე, რომ თუ სამართლიანობა არ იზეიმებს, უკაცრავად გამოთქმისთვის, „მალალეტკების“ ომი დაიწყება-თქო, დაიწყოს, არა უშავს, ეგ ჩემი პრობლემა არ არისო“, – განაცხადა სარალიძემ აქციაზე.
ზაზა სარალიძემ შეკრებილებს მადლობა გადაუხადა.
„მე მჯერა თქვენი, მე მჯერა ჩვენი ერთიანობის, რომ მომავალი თაობა ჩვენია და ეს ყოველთვის გვემახსოვრება. დიდი მადლობა ისევ და ისევ. მაპატიეთ, რომ შეგაწუხეთ. ძალაინ დიდი მადლობა“, – დასძინა სარალიძემ.
რუსთაველის გამზირზე აქცია სახელწოდებით „ნუ მომკლავ!“ ზაზა სარალიძის ორგანიზებით გაიმართა.
შეკრებილებმა მოითხოვეს, დაისაჯოს ყველა, ვინც ხორავას ქუჩაზე მომხდარი მკვლელობის ორგანიზატორები იყო, ასევე მათი მკვლელობის დაფარვის მონაწილეები.
აქციას შეუერთდა პანკისის ხეობის სოფელ დუისში ჩატარებული სპეცოპერაციის შედეგად მოკლული თემირლან მაჩალიკაშვილის მამა, მალხაზ მაჩალიკაშვილი, ასევე ყოფილი სახალხო დამცველი უჩა ნანუაშვილი და სხვადასხვა პოლიტიკური პარტიის წარმომადგენლები. ზაზა სარალიძეს სოლიდარობა გამოუცხადეს ძიუდოისტებმა, რომლებმაც გუშინ მორიგი აქცია გამართეს ძიუდოს ფედერაციის ხელმძღვანელის, დავით ქევხიშვილის გადადგომის მოთხოვნით.
ცნობისთვის, ხორავას ქუჩაზე ორი მოზარდი 2017 წლის 1-ელ დეკემბერს დაჭრეს. ერთი მოზარდი საავადმყოფოში მიყვანამდე გარდაიცვალა, მეორე მოზარდი კი, ექიმების მცდელობისა და რამდენიმე ოპერაციის ჩატარების მიუხედავად, მომდევნო დღეს საავადმყოფოში დაიღუპა.