სამართალი
არჩილ ტატუნაშვილის მამის ვარაუდით, მისი შვილის წამებაში დამხმარე პირების დასჯა რთული იქნება
არჩილ ტატუნაშვილის მამის, გიორგი ტატუნაშვილის ვარაუდით, მისი შვილის წამებაში დამხმარე პირების დასჯა რთული იქნება იმის გამო, რომ ისინი ოკუპირებულ ტერიტორიაზე იმყოფებიან.
„ძნელია მათი დასჯა და იქიდან გამოყვანა. მაგრამ მოლოდინი მაქვს. ადრე თუ გვიან დაისჯებიან“,-განუცხადა ჟურნალისტებს გიორგი ტატუნაშვილმა მცხეთის სასამართლოში საქმესთან დაკავშირებული პირველი სხდომის დაწყებამდე.
გიორგი ტატუნაშვილმა გამოძიების პროცესი დადებითად შეაფასა.
ოჯახის ადვოკატის, თამარ ავალიანის ცნობით, მნიშვნელოვანია, მოხდეს იმ პირების იდენტიფიცირება, ვინც უშუალოდ აწამებდნენ არჩილ ტატუნაშვილს.
„ბრალდებულები არიან გურწიევი და ტაბოევი, რომლებიც არიან სამართალდამცავი და უშიშროების დაწესებულებების წარმომადგენლები ე.წ. სამხრეთ ოსეთში. ეს არიან პირები, რომლებმაც თავისუფლება უკანონოდ აღუკვეთეს არჩილ ტატუნაშვილსა და მასთან ერთად მყოფ ორ პირს. ასევე ისინი არიან წამებაში დამხმარენი, რომლებმაც გადასცეს ცხინვალის სამართალდამცავ ორგანოებს საწამებლად არჩილ ტატუნაშვილი. ძალიან მნიშვნელოვანია, რომ მათი იდენტიფიცირება მოხდა და გამოძიებამ ამ მიმართულებით დამაკმაყოფილებლად იმუშავა, მაგრამ ყველაზე მნიშვნელოვანია, მოხდეს იმ პირების იდენტიფიცირება, რომლებმაც უშუალოდ აწამეს არჩილ ტატუნაშვილი და მიაყენეს 100-მდე დაზიანება“,- თქვა ავალიანმა და აღნიშნა, რომ გამოძიება ამ მიმართულებითაც მუშაობს.
22 თებერვალს საოკუპაციო ძალებმა არჩილ ტატუნაშვილი კიდევ 2 საქართველოს მოქალაქესთან ერთად დააკავეს. მომდევნო დღეს ოსურ მედიაში გავრცელდა ინფორმაცია ტატუნაშვილის დაღუპვის შესახებ. ქართული მხარის მოთხოვნის მიუხედავად, ოკუპირებული ცხინვალის რეჟიმმა დაღუპული ტატუნაშვილის ცხედარი ოჯახს თითქმის ერთი თვის შემდეგ, 20 მარტს გადასცა.