კონფლიქტის ზონა

არჩილ ტატუნაშვილის ცხედარი ცხინვალშია - კახაბერ ქემოკლიძე

სუს-ის ანალიტიკური სამსახურის უფროსის მოადგილის კახაბერ ქემოკლიძის ინფორმაციით, არჩილ ტატუნაშვილის ცხედარი ცხინვალშია.

როგორც ქემოკლიძემ გალში ინციდენტების პრევენციისა და მათზე რეაგირების მექანიზმის ფარგლებში მორიგი შეხვედრის დაწყებამდე განაცხადა, რუსეთის ფედერაციაში მხოლოდ საექსპერტო მასალებია გადაგზავნილი.

„დე ფაქტო ხელისუფლების ე.წ. საინფორმაციო საშუალებებში გავრცელდა ინფორმაცია, რომ ტატუნაშვილის ცხედარი რუსეთშია გადასვენებული. ჩვენ ცხელი ხაზის მეშვეობით კიდევ ერთხელ გადავამოწმეთ გვიან ღამით ეს ინფორმაცია და დაგვიდასტურეს, რომ ცხედარი ნამდვილად ცხინვალშია“, - აღნიშნა ქემოკლიძემ.

მისივე თქმით, სახელმწიფო უსაფრთხოების სამსახური და ხელისუფლება მუშაობს, რომ ცხედარი რაც შეიძლება მალე დაუბრუნდეს ოჯახს, ახალგორში უკანონოდ მყოფი ორი პირი კი ცენტრალური მთავრობის მიერ კონტროლირებად ტერიტორიაზე გადმოვიდნენ.

ამასთან, როგორც ქემოკლიძემ აღნიშნა, დე ფაქტო მთავრობებისა და რუსეთი საოკუპაციო ძალების მხრიდან სხვადასხვა დანაშაულში ბრალდებული პირების დაუსჯელობას კიდევ უფრო მძიმე შედეგები მოყვება.

“შევახსენებთ, როგორც დე ფაქტო ხელისუფლების, ასევე საერთაშორისო ორგანიზაციების წარმომადგენლებს, რომ აუცილებელია მკვლელობაში მსჯავრდებული პირის, მათ შორის, გიგა ოთხოზორიას მკვლელობაში ბრალდებული რაშიდ კანჯი-ოღლის დაკავება და ქართული კანონმდებლობით მისი გასამართლება”, - განაცხადა ქემოკლიძემ.

ნინო ექვთიმიშვილი