კონფლიქტის ზონა

არჩილ ტატუნაშვილის ცხედარს, სავარაუდოდ, დღეს გადმოასვენებენ

ოკუპირებული ცხინვალის ციხეში გაურკვეველ ვითარებაში გარდაცვლილი არჩილ ტატუნაშვილის ცხედარს მცხეთის რაიონის სოფელ წილკანში, სავარაუდოდ, დღეს გადაასვენებენ.

გადმოსვენების შემთხვევაში, შესაძლოა, ქართველმა სამართალდამცველებმა ცხედარი ექსპერტიზაზე გადაიტანონ.

დამატებითი დეტალები ტატუნაშვილის ოჯახის წევრებისთვისა და ნათესავებისთვის ცნობილი არ არის, თუმცა ისინი კატეგორიულად ეწინააღმდეგებიან ინფორმაციას, რომელსაც სამხრეთ ოსეთის არაღიარებული რეპუბლიკის უწყებები ავრცელებენ. კერძოდ, ტატანაშვილის მიერ დივერსიის მოწყობაში ბრალდებას. გარდაცვლილის ნათესავები დარწმუნებულები არიან, რომ არჩილ ტატუნაშვილი საოკუპაციო რეჟიმის წარმომადგენლებმა მოკლეს.

არჩილ ტატუნაშვილის მამა, გიორგი ტატუნაშვილი, ოკუპირებულ რეგიონში შვილის გადმოსასვენებლად გუშინ გაემგზავრა, თუმცა, შემდგომი პროვოკაციების თავიდან აცილების მიზნით, ის უკან დააბრუნეს.

შეგახსენებთ, რომ არჩილ ტატუნაშვილთან ერთად საოკუპაციო რეჟიმის წამრომადგენლებმა საქართველოს კიდევ ორი მოქალაქე დააკავეს, რომლებიც ამ დროისთვის ცხინვალის იზოლატორში იმყოფებიან. დაკავების შემდეგ ორივე მათგანს ჰქონდა კომუნიკაცია ახლობლებთან.

ცირა გურგენიძე