საზოგადოება

არსებობს უამრავი პრეცედენტი, რომლის დროსაც ირღვევა, როგორც სტუდენტის, ასევე პროფერ-მასწავლებელთა უფლებები - არასამთავრობო ორგანიზაციები

ხვალ, 9 დეკემბერს, 11:00 საათზე ადამიანის უფლებათა სახლში (ქანთარიას 11ა) „კონსტიტუციის 42-ე მუხლი“ და კერძო უმაღლესი სასწავლებელების ასოციაცია გამართავენ პრესკონფერენციას საგანმანათლებლო დაწესებულებებში არსებული პრობლემების შესახებ.

,,საგანმანათლებლო დაწესებულებებში დაგროვდა სამსჯელო, სადაო საკითხები, სირთულეები, რომელთაც სტუდენტები და პროფესორ-მასწავლებლები ყოველდღიურად აწყდებიან, თუმცა ისინი ამ პრობლემებზე სხვადასხვა მიზეზების გამო ხმამაღლა არ საუბრობენ.

არსებობს უამრავი პრეცედენტი, რომლის დროსაც ირღვევა, როგორც სტუდენტის, ასევე პროფერ-მასწავლებელთა უფლებები. ეს ყველაფერი გამომდინარეობს იქიდან, რომ არ არსებობს შესაბამისი რეგულაციის დადგენილი წესები.

ყველაზე ხშირია უფლებების დარღვევა შემდეგ სიტუაციებში: სტუდენტებისთვის სტატუსის შეჩერების ან შეწყვეტის საკითხებთან მიმართებაში, როდესაც ხდება პროცედურული წესების დარღვევა არაუფლებამოსილი ორგანოს მიერ.

ხშირია პროფესორ-მასწავლებელთა უფლებების დარღვევაც როგორც შრომითი, ისე საავტორო უფლებების კუთხით. მაგალითისთვის შეგვიძლია მოვიყვანოთ ერთ–ერთი ფაქტი, საკუთარ შედგენილ სილაბუსზე პროფესორებს არ აქვთ ავტორობის უფლება. ამასთანავე ხშირია შრომითი ურთიერთობების პირობების დარღვევა. არის შემთხვევები, როდესაც აკადემიური თანამდებობის მქონე პირებს უმაღლესი სასწავლებელი უხდის ხელფასს მხოლოდ ჩატარებული ლექციების მიხედვით და არ ითვალისწინებს მის მონაწილეობას სხვა აკადემიურ აქტივობებში. ანაზღაურების საკითხებში კიდევ არაერთი პრობლემა არსებობს.

ამ პრობლემების უკეთესად შესასწავლად და რეაგირების მექანიზმების შესამუშავებლად არასამთავრობო ორგანიზაცია „კონსტიტუციის 42-ე მუხლი“ და „კერძო უმაღლესი სასწავლებელების ასოციაცია “აფორმებენ ურთიერთთანამშრომლობის მემორანდუმს და ხსნიან სტუდენტთა და პროფესორ-მასწავლებელთა დაცვის ცენტრს“, - აცხადებენ ორგანიზაციებში.