ეკონომიკა

ასეთი დაბალი ეკონომიკური ზრდის პირობებში წინსვლა ვერ გვექნება - ზურაბ ჭიაბერაშვილი

„ევროპული საქართველოს“ წევრის ზურაბ ჭიაბერაშვილის განცხადებით, საქსტატის მიერ გამოქვეყნებული მონაცემების მიხედვით, ქვეყანა 2013 წლის დონეზეა.

როგორც ჭიაბერაშვილმა ბრიფინგზე აღნიშნა, „მოქალაქეებისთვის უზარმაზარ პრობლემად რჩება ფასების ზრდა, რომელმაც 2017 წლის ივლისში, წინა წლის ივლისთან შედარებით, 6% შეადგინა“.

„ფასების საგრძნობი ზრდა დაფიქსირდა პრაქტიკულად ყველაფერზე, რასაც სასურსათო მაღაზიაში ჩვენი მოქალაქეები ყიდულობენ, ასევე მედიკამენტებსა და, ზოგადად, ჯანმრთელობის დაცვის სფეროში. განსაკუთრებით დიდია ფასების ზრდა ტრანსპორტის ჯგუფში-12,6%, რაც “ქართული ოცნების” მიერ საწვავზე აქციზის მატების პირდაპირი შედეგია და რაც ჯაჭვურად გადაეცა ზემოთ ჩამოთვლილ საკვებ პროდუქტებსაც.

გაზის ტარიფის 11-12-13-თეთრიანი,ზოგან 16-16 თეთრითაც, გაზრდა საქართველოს ქალაქებისა და რაიონების დიდ ნაწილში კიდევ უფრო გაუძვირებს ცხოვრებას ჩვენი მოქალაქეების უმრავლესობას. მათ მეტი საფასურის გადახდა მოუწევთ არა მხოლოდ ბუნებრივ აირში, არამედ გაძვირებულ პროდუქტშიც, რადგან გაზის ტარიფის ზრდა დამატებითი ბიძგი იქნება ინფლაციისთვის. საგანგაშოა, რომ მოსალოდნელია ელექტროენერგიის ტარიფის გაზრდაც.

სამწუხაროდ, 2016 წელს, წინა წელთან შედარებით, ქვეყანაში სიღარიბე გაიზარდა. ასეთი დაბალი ეკონომიკური ზრდის პირობებში წინსვლა ვერ გვექნება.

გამოსავალია “ევროპული საქართველოს” მცირე და საშუალო ბიზნესის მხარდაჭერის პროგრამა, რომელიც გადასახადების შემცირების გზით ეკონომიკური ზრდის დაჩქარებაზე, უმუშევრობის შემცირებაზე, ფასების დასტაბილურებასა და მოქალაქეთა შემოსავლების ზრდაზეა ორიენტირებული“,- განაცხადა ზურაბ ჭიაბერაშვილმა.

მონიკა დავლიანიძე