მსოფლიო
აშშ-ის კონგრესის წარმოამდგენელთა პალატამ რუსეთს სანქციები გაუმკაცრა
აშშ-ის კონგრესის წარმომადგენელთა პალატამ რუსეთს, ირანსა და ჩრდილოეთ კორეას სანქციები გაუმკაცრა და ფაქტობრივად აუკრძალა აშშ-ის პრეზიდენტ დონალდ ტრამპს ამ სანქციების გაუქმება პარლამენტის თანხმობის გარეშე.
„ეს სამი რეჟიმი ამერიკის სასიცოცხლო ინტერესებს უქმნის საფრთხეს და მათივე მეზობლების დესტაბილიზაციას ახდენს“, -განაცხადა პალატის საგარეო ურთიერთობათა კომიტეტის თავმჯდომარემ, რესპუბლიკელმა ედ როისმა.
დოკუმენტს პალატამ დიდი უმრავლესობით დაუჭირა მხარი - პალატის 419-მა წევრი 3-ის წინააღმდეგ.
კანონპროექტის თითქმის ნახევარი - 184 გვერდი ეძღვნება რუსეთს, კერძოდ, რუსეთის მიერ საქართველოსა და უკრაინის ტერიტორიების ოკუპაციას, აშშ-ისა და სხვა ქვეყნების კიბერუსაფრთხოებაზე თავდასხმას, ასევე ამერიკის საპრეზიდენტო არჩევნების შედეგებზე გავლენის მოხდენის მცდელობას, ბაშარ ასადის დიქტატურის მხარდაჭერას სირიაში და ა.შ.
დოკუმენტის შემუშავების მიზეზი გახდა დონალდ ტრამპის ბუნდოვანი განცხადებები რუსეთთან ურთიერთობების ნორმალიზების შესახებ, ასევე რუსეთის მიმართ გამოთქმული ბრალდებები დემოკრატიული პარტიის კომპიუტერების „გატეხვისა“ და აშშ-ის საპრეზიდენტო არჩევნებში სავარაუდო გავლენის მოხდენის გამო, რასაც მოსკოვი არ აღიარებს.
სანამ კანონპროექტი აშშ-ის პრეზიდენტს გადაეგზავნება, პალატისა და სენატის სანქციები უნდა შეჯერდეს.
პრეზიდენტის ვეტოს შემთხვევაში კონგრესი, სავარაუდოდ, მას დაძლევს.
ანა მებურიშვილი