საზოგადოება
აშშ-ის საელჩო საქართველოში გმობს ე.წ. სამხრეთ ოსეთში დაგეგმილ რეფერენდუმს
შშ-ის საელჩო საქართველოში ეხმაურება ოკუპირებულ სამხრეთ ოსეთში 9 აპრილს დაგეგმილ რეფერენდუმს რეგიონის „ალანიად“ გადარქმევასთან დაკავშირებით.
აშშ-ის საელჩო ამ რეფერენდუმს უკანონოს უწოდებს და მიმართავს ჟენევის მოლაპარაკებებში ჩართულ მხარეებს, თავი აარიდონ სიტუაციის გამწვავებისგან.
„აშშ-ის საელჩო გმობს არალეგიტიმური „რეფერენდუმის“ ჩატარების გადაწყვეტილებას საქართველოს სამხრეთ ოსეთის რეგიონში, რომელიც 9 აპრილს არის დაგეგმილი. ასეთი პროვოკაციული ქმედებები კარგავს ნდობას და აკნინებს ჟენევის საერთაშორისო მოლაპარაკებების მნიშვნელობას. ამერიკის შეერთებული შტატები არ აღიარებს იმ უკანონო რეფერენდუმის შედეგებს, რომელიც საქართველოს ტერიტორიაზე საქართველოს ხელისუფლების თანხმობის გარეშე გაიმართება. ორივე რეგიონი, სამხრეთ ოსეთიცა და აფხაზეთიც, წარმოადგენს საქართველოს ტერიტორიის განუყოფელ ნაწილს. ჩვენ კვლავ მკაფიოდ ვუჭერთ მხარს საქართველოს სუვერენიტეტსა და ტერიტორიულ მთლიანობას მის საერთაშორისოდ აღიარებულ საზღვრებში.
ამერიკის შეერთებული შტატები მხარს უჭერს ჟენევის საერთაშორისო მოლაპარაკებებს, როგორც ფორუმს სადაც განიხილება საქართველოს აფხაზეთისა და სამხრეთ ოსეთის რეგიონებში არსებული მდგომარეობა. მოვუწოდებთ ყველა მხარეს, თავი აარიდონ ქმედებებს, მათ შორის შემოთავაზებულ რეფერენდუმს, რომლებიც ჟენევის მოლაპარაკებების მნიშვნელობას აკნინებს“, - ნათქვამია განცხადებაში.
ანა მებურიშვილი