მსოფლიო
აშშ იუნესკოდან გადის
აშშ „იუნესკოდან“ გადის, - ამის შესახებ სახელმწიფო დეპარტამენტში განაცხადეს. ვაშინგტონის განმარტებით, ამის მიზეზად დაასახელეს ორგანიზაციის „ანტიისრაელური მიმართულება“.
წასვლის კოდევ ერთი საბაბია საწევრო გადასახადებზე დავალიანების ზრდა. სახელმწიფო დეპარტამენტის თქმით, ორგანიზაციაში ფუნდამენტური რეფორმები უნდა გატარდეს.
აღსანიშნავია, რომ აშშ ორგანიზაციასთან დამკვირვებელთა სტატუსს შეინარჩუნებს, რათა გაიზიაროს თავისი გამოცდილება პრესის თავისუფლებისა და მსოფლიო მემკვიდრეობის დაცვის კუთხით.
აშშ-მ ერთხელ უკვე დატოვა იუნესკო 1984 წელს. მაშინდელმა პრეზიდენტმა რონალდ რეიგანმა ორგანიზაცია საბჭოთა კავშირისადმი სიმპათიაში დაადანაშაულა. აშშ მას დაუბრუნდა 2002 წელს ჯორჯ ბუშ-უმცროსის მმართველობის დროს.
ვაშინგტონმა შეაჩერა იუნესკოს დაფინანსება 2011 წელს, როცა მასში პალესტინა გაწევრიანდა.
ორგანიზაცია 1945 წლის 16 ნოემბერს დაარსდა. მისი შტაბ-ბინა პარიზში მდებარეობს. 2011 წლის 1 ნოემბრის მონაცემებით, "იუნესკო" აერთიანებს 195 ქვეყანას. მას ასევე 50 წარმომადგენლობითი ოფისი, რამდენიმე ინსტიტუტი და ცენტრი აქვს მსოფლიოში.
ანა მებურიშვილი