საზოგადოება

აზერბაიჯანის გენერალური პროკურატურის განცხადება აფგან მუხთარლის დაკავების შესახებ

აზერბაიჯანული მედია აზერბაიჯანის გენერალურ პროკურატურაზე დაყრდნობით ავრცელებს ინფრომაციას ჟურნალისტ აფგან მუხთარლის დაკავების შესახებ.

განცხადების თანახმად, 29 მაისს, ადგილობრივი დროით 22:40 საათზე მუხთარლი ბალაქანის რაიონში, საზღვრის უკანონოდ კვეთის დროს დააკავეს.

გავრცელებული ცნობით, მუხთარლიმ დაკავებისას მესაზღვრეებს წინააღმდეგობა გაუწია. დაკავებულს აღმოუჩინეს დიდი ოდენობის თანხა უცხოურ ვალუტაში.

საქართველოს შინაგან საქმეთა სამინისტროს განცხადებით, აზერბაიჯანელი ჟურნალისტის აფგან მუხტარლის საქმესთან დაკავშირებით საქართველოს შსს-მ გამოძიება დაიწყო საქართველოს სსკ-ის 143-ე მუხლით, რაც თავისუფლების უკანონო აღკვეთას გულისხმობს. უწყების ინფორმაციით, „მიმდინარეობს კომუნიკაცია აზერბაიჯანულ მხარესთან. როგორც კი დადგინდება ფაქტობრივი გარემოებები, საზოგადოებას მიეწოდება დეტალური ინფორმაცია“.

აზერბაიჯანელი ჟურნალისტი და აქტივისტი აფგან მუხტარლი 29 მაისს გაუჩინარდა. გუშინ კი გავრცელდა ინფორმაცია, რომ ჟურნალისტი ბაქოს სახელმწიფო საზღვრის სამსახურის საგამოძიებო განყოფილებაში იმყოფებოდა. ჟურნალისტი აზერბაიჯანის საზღვარზე უკანონოდ გადაკვეთისა და დეკლარაციის გარეშე დიდი ოდენობით თანხის გადატანის ბრალდებით დააკავეს.

ანა მებურიშვილი