უახლესი ამბები
არქივი
პოლიტიკა
აზიურ ფაროსანაზე ამდენი ყურადღების გამახვილება ცოტა გადაჭარბებულია - გარემოს დაცვისა და სოფლის მეურნეობის მინისტრი
გარემოს დაცვისა და სოფლის მეურნეობის მინისტრის, ლევან დავითაშვილის განცხადებით, აგრარულ საკითხთა კომიტეტში პარლამენტარებთან დაგეგმილ შეხვედრაში აზიურ ფაროსანაზე ყურადღების გამახვილება გადაჭარბებული იქნება.
მინისტრის მტკიცებით, უწყება სრულიად მომზადებულია 2018 წელს მავნებელთან საბრძოლველად.
„მე ვფიქრობ, რომ ფაროსანა არ უნდა იყოს პარლამენტში ჩვენი განხილვის მთავარი თემა. რადგან ფაროსანას გარდა ძალიან ბევრი სხვა მიმართულებაა სოფლის მეურნეობაში. რა თქმა უნდა, ეს მნიშვნელოვანი გამოწვევაა ჩვენთვის, მაგრამ არა ერთადერთი და არა უმნიშვნელოვანესი. ეს არის სასოფლო-სამეურნეო მავნებელი, მარტივად რომ ვთქვათ, ის არის მწერი უბრალოდ და ამაზე ამდენი ყურადღების გამახვილება ცოტა გადაჭარბებულიც არის და საპარლამენტო განხილვის მთავარი თემა ეს ნამდვილად არ უნდა იყოს.
არაერთი შეხვედრა ყოფილა ამასთან დაკავშირებით სპეციალისტებთან ერთად, იყო სხვადასხვა ფორმატში ამის განხილვა. ვფიქრობ, რომ როცა სოფლის მეურნეობაზე ვსაუბრობთ, პოლიტიკის ნაწილში ამაზე ყურადღება ნამდვილად არ უნდა გამახვილდეს, ეს ჩემი აზრია და ამაზე პარლამენტარებს მეც ვეტყვი. სამწუხაროდ, პოლიტიზებული იქნა ეს თემა, არადა არის აბსოლუტურად ტექნიკური საკითხი, სოფლის მეურნეობის მიმდინარე გამოწვევა. ამ საკითხზე კომუნიკაცია ფერმერებთან 2017 წელს დაიწყო და შედგა. 2018 წელს გარემოს დაცვისა და სოფლის მეურნეობის სამინისტრო სრულად მომზადებული ხვდება, ჩატარებულია ყველა ის მოსამზადებელი სამუშაო, რაც საჭიროა ჩვენი ფიტოსანიტარული შესაძლებლობების გასაძლიერებლად. მერწმუნეთ, ამისთვის მზად ვართ", - განუცხადა დავითაშვილმა ჟურნალისტებს.
ის ასევე გამოეხმაურა აგრარულ საკითხთა საპარლამენტო კომიტეტის თავმჯდომარის, ოთარ დანელიას კრიტიკას რეგიონული განვითარებისა და ინფრასტრუქტურის მინისტრის, ზურაბ ალავიძის მიმართ, რომლის მიხედვით, ალავიძე ბოლომდე არ ესწრება და მალევე ტოვებს ფაროსანასთან საბრძოლველად შექმნილ სახელმწიფო კომისიის სხდომებს.
„მინდა დავაფიქსირო, რომ 2018 წელს საქართველოს მთავრობას კოორდინაცია არ აკლია, არ აკლდა არც 2017 წელს. აბსოლუტურად კოორდინირებულად ვმუშაობთ და ასევე გავაგრძელებთ. 2017 წელს კომისიის ფორმატი ასეთი ფართომასშტაბიანი არ იყო, თუმცა 2018 წელს ამის ფორმალიზებაც გავაკეთეთ და კომისიის სახე მივეცით ამ ყველაფერს, იმ ურთიერთობას, რომელიც მთავრობის სხვადასხვა ბლოკს სჭირდება ამ გამოწვევის სწორად მართვისთვის. ვფიქრობ, რომ გასულ წელს მიღებული გამოცდილებით, 2018 წელს ძალიან ეფექტურ კამპანიას ჩავატარებთ. ვფიქრობ, რომ მოსახლეობაც უფრო მომზადებულია და 2018 წელს მეტი შედეგები გვექნება", - თქვა დავითაშვილმა.
დავითაშვილი დეპუტატების წინაშე დღეს 12 საათზე წარდგება.