სამართალი

ბაჩო დოლიძემ გენერალურ პროკურატურაში რუსეთის მოქალაქის ვსევოლოდ ოსიპოვის წინააღმდეგ განცხადება შეიტანა

“ერთიანი ნაციონალური მოძრაობის” წევრმა, ბაჩო დოლიძემ გენერალურ პროკურატურაში რუსეთის მოქალაქის ვსევოლოდ ოსიპოვის წინააღმდეგ განცხადება შეიტანა .

როგორც დოლიძემ, პროკურატურასთან ჟურნალისტებს განუცხადა, საქმე უნდა აღიძრას ვსევოლოდ ოსიპოვის წინააღმდეგ, რადგან მას დავალებული ჰქონდა ჯაშუშური საქმიანობა და სხვა ადამიანების თვალთვალი.

„საქმე ეხება რუსეთის მოქალაქეს, ოსიპოვს, რომელიც 1 თვეა საჯაროდ საუბრობს იმაზე თუ როგორ ავალებდნენ რუსეთის სპეცსამსახურები ჯაშუშურ საქმიანობას. აღნიშნული პიროვნება ამბობს, რომ ფლობს ინფორმაციას სხვა ადამიანების შესახებ , რომლებიც ასევე შესაძლოა დაკავშირებული იყვნენ აღნიშნულ საქმეში. ერთი თვე გავიდა და სამართალდამცავ უწყებას რეაგირება არ მოუხდენია.

როდესაც გაიგეს, რომ ჩვენ ამ საკითხით ვინტერესდებით , გუშინ გვიან მოხდა ამ ადამიანის დაკითხვა. დიდი იმედი მაქვს , რომ ამ ადამიანს არ გადასცემენ რუსეთს და ის ინფორმაცია, რომელსაც ფლობს ეს ადამიანი მაქსიმალურად იქნება გამოყენებული ჩვენი ქვეყნის ინტერესებში“,- განაცხადა დოლიძემ.

ცნობისთვის, 19 წლის ვსევოლოდ ოსიპოვმა „ეხო კავკაზისთვის“ მიცემულ ინტერვიუში განაცხადა, რომ ფსბ-თან თანამშრომლობდა. როგორც მან ინტერვიუში აღნიშნა, მისი ბოლო დავალება იყო წასულიყო საქართველოში და საქართველოში საცხოვრებლად გადმოსულ რუსეთის მოქალაქეებისთვის ეთვალთვალა.