კომენტარი
ბადრი ესებუა იმყოფება საქართველოში, მას არ დაუტოვებია ქვეყანა - ვახტანგ გომელაური
საქართველოს შინაგან საქმეთა მინისტრის, ვახტანგ გომელაურის განცხადებით, „საქართველოს ბანკზე“ თავდასხმის საქმეზე ბრალდებულ ბადრი ესებუას დასაკავებლად მუშაობა მიმდინარეობს.
„ვმუშაობთ ამ თემაზე. მნიშვნელოვანი თემაა, მით უმეტეს შინაგან საქმეთა სამინისტროსთვის ეს ღირსების თემაა. ასეთი რამ დიდი ხანია, არ მომხდარა. იყო რაღაც თემები, სახუმარო თემა ნამდვილად არ არის, ამდენი ადამიანი ჰყავდა მძევლად აყვანილი. ვისაც ყველაზე მეტად უნდა ამ ადამიანის დაკავება და პასუხისგებაში მიცემა, ეს არის შინაგან საქმეთა სამინისტრო. ჩვენი ოპერატიული ინფორმაციით, იმყოფება საქართველოში, მას არც დაუტოვებია ქვეყანა, იმედია, სწორი ინფორმაციაა და ვეყრდნობით ამ წყაროს, რომ აქ არის. მე არ მითქვამს, რომ მისი ადგილსამყოფელი იდენტიფიცირებულია“, – განაცხადა ვახტანგ გომელაურმა.
შეგახსენებთ, ზუგდიდში, „საქართველოს ბანკის“ ფილიალზე თავდასხმა ბადრი ესებუამ გასული წლის 25 ოქტომბერს განახორციელა. გამოძიება სსკ-ის 236-ე, 323-ე და 329-ე მუხლებით მიმდინარეობს, რაც ტერორისტულ აქტს, მძევლების აყვანას ტერორისტული მიზნით და ცეცხლსასროლი იარაღის უკანონო შეძენა-შენახვა-ტარებას გულისხმობს.
ბადრი ესებუას სამართალდამცავი უწყებები უკვე 7 თვეზე მეტია ეძებენ, თუმცა მისი დაკავება ამ დრომდე ვერ მოახერხეს.