საზოგადოება
ბანკების ასოციაციის აღმასრულებელი დირექტორი ონლაინ სესხების კომპანიებს მიკროსაფინანსოებად ჩამოყალიბებას ურჩევს
საქართველოს ბანკების ასოციაციის აღმასრულებელი დირექტორი, გიორგი ცუცქირიძე ონლაინ სესხების კომპანიებს მიკროსაფინანსოებად ჩამოყალიბებას ურჩევს.
როგორც ცუცქირიძემ დღეს გამართულ პრესკონფერენციაზე განაცხადა, აღნიშნულ კომპანიებს აქვთ შესაძლებლობა, უფრო სოლიდურ საკრედიტო ორგანიზაციებად ჩამოყალიბდნენ.
"ვფიქრობ, თუ ეს არის სოლიდური კაპიტალით შექმნილი ორგანიზაციები, დაახლოებით, 100 ათასი დოლარია საჭირო, 250 ათას ლარამდე, რომ კვალიფიციურ საკრედიტო ინსტიტუტად, მიკროსაფინანსო ორგანიზაციად გადაკეთდეს", - განაცხადა ცუცქირიძემ.
ბანკების ასოციაციის აღმასრულებელი დირექტორი მთავრობის გადაწყვეტილებას გამოეხმაურა და აღნიშნა, რომ ტენდენცია, რომელიც ამ სექტორში იყო, სამართლიანობის პრინციპს არღვევდა ბანკებთან და მიკროსაფინანსო ორგანიზაციებთან მიმართებაში, ამიტომ მსგავსი გადაწყვეტილებით, დაცული იქნება კლიენტებთან ურთიერთობის ეთიკის კოდექსი.
ონლაინ სესხებთან დაკავშირებით არსებულ პროექტზე საქართველოს პრემიერ-მინისტრმა გიორგი კვირიკაშვილმა მთავრობის გუშინდელ სხდომაზე განაცხადა. კვირიკაშვილის თქმით, მთავრობა ეროვნულ ბანკთან ერთად მომხმარებელთა უფლებების დაცვის საკანონმდებლო პაკეტს ამზადებს, რომლის მიხედვითაც, ონლაინ-სესხების გაცემა აიკრძალება.
ნინო ექვთიმიშვილი