მსოფლიო

ბატონო პუტინ, გთხოვთ, გაეთრიეთ უკრაინიდან - პეტრო პოროშენკო

„ბატონო პუტინ, გთხოვთ, გაეთრიეთ უკრაინიდან“, -ამის შესახებ უკრაინის პრეზიდენტმა პეტრო პოროშენკომ ამერიკულ ტელეარხ NBC-ისთვის მიცემულ ინტერვიუში განაცხადა.

მისივე ინფორმაციით, მან მიმართა აშშ-ის პრეზიდენტ დონალდ ტრამპს, არგენტინაში დაგეგმილ დიდი ოცეულის სამიტზე გადასცეს ეს მესიჯი რუსეთის პრეზიდენტ ვლადიმერ პუტინს.

„რუსეთის რეალური მიზანი ზღვის ოკუპაციაა. რაც მოხდა, აგრესიის წამოწყება იყო. ჩვენ მზად უნდა ვიყოთ რუსეთის აგრესიისთვის. ვემზადებით ჩვენი ქვეყნის დასაცავად. რუსეთის წინააღმდეგ ვიბრძვით თავისუფლებისა და დემოკრატიისთვის. რუსეთი თავს გვესხმის იმის გამო, რომ არ გვსურს რუსეთის იმპერიის ნაწილი ვიყოთ. რამდენიმე შეხვედრა მქონდა ამერიკის პრეზიდენტთან და ვიცი, რომ ის მტკიცედ უჭერს მხარს უკრაინის სუვერენიტეტს, ტერიტორიულ მთლიანობას და ჩვენს ბრძოლას. რუსეთი დიდ ფასს გადაიხდის, თუ თავს დაგვესხმება“, - განაცხადა პოროშენკომ.

ცნობისთვის, 25 ნოემბერს რუსეთის სამხედრო საზღვაო ფლოტის ხომალდებმა უკრაინის კატარღებს ოდესის პორტიდან მარიუპოლის პორტში გადაადგილების დროს ცეცხლი გაუხსნეს, შემდგომში კი დააკავეს. კიევის განმარტებით, ხომალდები ყველა ნორმის დაცვით მოძრაობდნენ, თუმცა „ეფ ეს ბე“-ში ამტკიცებდნენ, რომ მეზღვაურები სახიფათო მანევრებს ასრულებდნენ, მათ შესაჩერებლად კი რუს სამხედროებს ცეცხლის გახსნა მოუწიათ.

ინციდენტის შედეგად, უკრაინის ექვსი მოქალაქეა დაშავებული.