რეგიონები

ბათუმის კლინიკის 10-მდე თანამშრომელი კარანტინში გადაიყვანეს

ბათუმში, კლინიკა „მედინადან" 10-მდე მედიკოსი საკარანტინო სივრცეში გადაიყვანეს. არსებული ინფორმაციით, მედიკოსებს კორონავირუსით დაინფიცირებულ ერთ-ერთ პაციენტთან ჰქონდათ შეხება.

როგორც კლინიკაში განაცხადეს, სამედიცინო დაწესებულებაში შეყვანისას პაციენტს ცხელება არ ჰქონდა, თუმცა, პერსონალმა მალევე ივარაუდა, რომ შესაძლოა, ქალს კორინავირუსი ჰქონოდა და პირველადი კვლევების ჩატარების შემდეგ ის ე.წ. ცხელების ცენტრში გადაამისამართეს.

ბათუმში დღეს ახალი კორონავირუსი 60 წლის ქალს დაუდასტურდა, რომლის ინფიცირების წყარო ჯერ უცნობია. სამედიცინო დაწესებულებაში გადაყვანამდე პაციენტთან იმყოფებოდა სასწრაფო დახმარების სამსახურის ორი ბრიგადა, რის შემდეგაც იგი კლინიკაში გადაიყვანეს. ამასთან, ირკვევა, რომ აღნიშნული მოქალაქე ქობულეთის ერთ-ერთ სოფელშიც იმყოფებოდა.